Gündəm24.az xəbər verir ki, İran Xarici İşlər Nazirliyi bəyan edib ki, Yaxın Şərqdə gərginliyin azaldılması ilə bağlı təşəbbüslər ABŞ-a ünvanlanmalıdır. Nazirliyin bazar ertəsi yaydığı açıqlamada bildirilib ki, region ölkələri gərginliyin azaldılması üçün müxtəlif təkliflər irəli sürsələr də, müharibəni başladan tərəf Vaşinqton olduğu üçün müraciətlər məhz ora yönəlməlidir.
Mehr xəbər agentliyinin məlumatına görə, rəsmi Tehranın mövqeyində qeyd olunur ki, İran müharibəni başlayan tərəf deyil və regional ölkələrin bütün çağırışları ABŞ-a istiqamətləndirilməlidir. Bəyanatda vurğulanıb ki, bölgədə vəziyyətin sabitləşməsi üçün əsas addımlar Vaşinqton tərəfindən atılmalıdır.
Məlumata əsasən, ABŞ və İsrail 28 fevral tarixində İrana qarşı hərbi əməliyyata başlayıb və hücumlar zamanı paytaxt Tehran da daxil olmaqla ölkənin bir sıra böyük şəhərləri hədəfə alınıb. Ağ Ev isə bu addımı İrandan gələn raket və nüvə təhdidləri ilə əsaslandırıb.
Bundan sonra İslam İnqilabı Keşikçiləri Korpusu İsraildəki obyektləri hədəf alan cavab əməliyyatı elan edib. Məlumata görə, həmçinin Bəhreyn, İordaniya, Küveyt, Qətər, Səudiyyə Ərəbistanı və Birləşmiş Ərəb Əmirlikləri ərazilərində yerləşən ABŞ hərbi bazalarına da zərbələr endirildiyi bildirilir.
Eyni zamanda məlumatda qeyd olunub ki, ABŞ-İsrail birgə hücumu nəticəsində İranın Ali Rəhbəri Ayətullah Əli Xamenei və ölkənin bəzi digər yüksək vəzifəli şəxsləri həlak olub.
Sədaqət Həsənova
