Rusiya xarici işlər naziri əlavə edib ki, Moskva Amerika nümayəndələri Stiv Vitkov və Cared Kuşnerlə təmaslara açıq olduğunu göstərir.
Gündəm24.az xəbər verir ki, Rusiyanın xarici işlər naziri Sergey Lavrov ABŞ-ın Venesueladakı fəaliyyətini və ümumilikdə Vaşinqtonun siyasətini sərt şəkildə tənqid edib. Onun sözlərinə görə, ABŞ-ın Venesuelada həyata keçirdiyi əməliyyat beynəlxalq hüququn kobud şəkildə pozulmasıdır və bu, Vaşinqtonun beynəlxalq münasibətlər sisteminə hörmətsizliyini açıq nümayiş etdirir. Lavrov vurğulayıb ki, vicdansız və ayrı-seçkilik xarakterli sanksiyalar ABŞ-ın qlobal mövqeyinin zəiflədiyini göstərir.
Nazir bildirib ki, Moskva ABŞ-ın Ukraynanı NATO-dan kənarda saxlamaq cəhdlərini görür və bunu nəzərə alır. Rusiya eyni zamanda ABŞ nümayəndələri Stiv Vitkov və Cared Kuşnerlə təmaslara açıqdır. Lavrovun sözlərinə görə, prezident Vladimir Putinin bu emissarlarla görüşləri Ukrayna böhranının kök səbəblərini anlamağa və onların aradan qaldırılması yollarını tapmağa yönəlib.
Lavrov qeyd edib ki, ABŞ qloballaşma və beynəlxalq münasibətlər sistemini özü dağıdır, Rusiya ilə əməkdaşlıq edən ölkələrə qarşı mümkün 500 faiz rüsum ideyası isə qeyri-ciddidir. Onun sözlərinə görə, bu cür addımlar Vaşinqtonun rəqabət mövqeyinin zəiflədiyini göstərir.
Venesuela ilə bağlı Lavrov Moskvanın Karakasla əldə olunmuş razılaşmalara sadiq qaldığını bildirib və ABŞ-ın bu ölkədəki addımlarının qanunsuz olduğunu vurğulayıb. O əlavə edib ki, Rusiya–İran münasibətlərinə heç bir üçüncü tərəf təsir göstərə bilməz, çünki bu əlaqələr iki ölkənin maraqlarına uyğundur.
Ukrayna böhranına toxunan nazir Avropanın atəşkəs təşəbbüslərini Kiyev üçün vaxt qazanmaq cəhdi kimi qiymətləndirib, Fransa prezidenti Emmanuel Makronun bəyanatlarını isə “mikrofon diplomatiyası” adlandırıb. Lavrov həmçinin kollektiv Qərbin Rusiya ilə qarşıdurmaya hazırlaşdığını bildirib və Afrikanın, o cümlədən Namibiyanın, böhranın yalnız kök səbəblər aradan qaldırıldıqdan sonra həll edilə biləcəyi mövqeyini dəstəklədiyini qeyd edib.
Sədaqət Həsənova
