Gündəm24.az xəbər verir ki, CNN-in məlumatına görə, qaçırıldığı iddia edilən Venesuela prezidenti Nikolas Maduro və həyat yoldaşı Siliya Flores Nyu-York şəhərinin cənubunda yerləşən Bruklin rayonundakı Metropoliten Saxlama Mərkəzinə aparılıb. Məlumata əsasən, onların olduğu təyyarə yanvarın 3-də yerli vaxtla saat 16:30-da Nyu-York ştatının Stüard hava limanına enib.
Enişdən sonra Maduro və Flores əvvəlcə ABŞ Narkotiklərlə Mübarizə İdarəsinin (DEA) əməkdaşlarına təhvil verilib, daha sonra isə təcridxanaya yerləşdiriliblər. NBC News yazır ki, Venesuela lideri bazar ertəsi Nyu-Yorkda məhkəmə qarşısına çıxarıla bilər.
Hadisə Venesuelada və beynəlxalq arenada ciddi gərginliyə səbəb olub. Venesuela xarici işlər naziri İvan Gil Pinto ABŞ-ın Karakasdakı mülki və hərbi obyektlərə zərbələr endirdiyini bildirərək bunu hərbi təcavüz kimi qiymətləndirib və ölkədə fövqəladə vəziyyət elan olunduğunu açıqlayıb. ABŞ prezidenti Donald Tramp isə hücumu təsdiqləyib və Nikolas Maduro ilə həyat yoldaşının tutularaq ölkədən çıxarıldığını bəyan edib.
Sədaqət Həsənova
