Rusiya xarici işlər nazirinin müavini Andrey Rudenkonun sözlərinə görə, Moskva Ukrayna münaqişəsinin tənzimlənməsi ilə bağlı danışıqlara hazırdır, lakin hələlik konkret tarixlər müəyyən edilməyib.
Gündəm24.az TASS-a istinadən xəbər verir ki, Rusiya xarici işlər nazirinin müavini Andrey Rudenko bildirib ki, Rusiya prezidenti Vladimir Putinin Çinə planlaşdırılan səfərinin tarixləri hazırda dəqiqləşdirilir və yaxın vaxtlarda açıqlanacaq. O, həmçinin qeyd edib ki, Rusiyanın xarici işlər naziri Sergey Lavrovun yaxın zamanda Hindistana səfəri də gündəmdədir.
Rudenko Moskvanın Ukrayna münaqişəsinin tənzimlənməsi ilə bağlı danışıqlara hazır olduğunu bildirib. Onun sözlərinə görə, hələlik belə görüşlər üçün konkret tarix müəyyən edilməyib və Ukrayna tərəfi iştirak etmək istəsə, Rusiya bu danışıqlara açıqdır.
O, həmçinin qeyd edib ki, Rusiya ABŞ-la bağlı mövqeyini dəyişməyib və Moskva heç vaxt Vaşinqton barədə illüziyalar bəsləməyib. Rudenko ABŞ-ın İrana qarşı mümkün quru əməliyyatının regionda vəziyyəti daha da gərginləşdirə biləcəyini vurğulayıb.
Rusiya tərəfi Buşehr Atom Elektrik Stansiyası ilə bağlı vəziyyətə də toxunaraq belə obyektlərə qarşı hər hansı hücumun Yaxın Şərq üçün ciddi nəticələr doğura biləcəyini bildirib. Moskva həmçinin Hörmüz boğazının blokadasını dəstəkləmədiyini, lakin İranın özünümüdafiə hüququnun olduğunu qeyd edib.
Sədaqət Həsənova
