Qərbi Azərbaycan kökənli ziyalılardan biri olan Araz İsmayılov ömrünü təhsilin inkişafına həsr etmiş görkəmli pedaqoqlardan idi. Onun həyatı yalnız pedaqoji fəaliyyətlə məhdudlaşmır, həm də maarifçilik ideyalarının təbliği və gənc nəslin yetişdirilməsi ilə yadda qalır.
Ramiz İsmayılov əmisi haqqında xatirələrini bölüşərkən onun sadəliyini və zəhmətkeşliyini xüsusi vurğulayır:
“Əmim hər il yay tətilində kəndə gələr, tələbə yoldaşlarından da bir neçəsini özü ilə gətirərdi. Lovğalıq ona tamamilə yad idi. Ot və odun tədarükünə kömək göstərər, əkin sahələrinin suvarılmasına, su nasoslarının fasiləsiz və saz işləməsinə nəzarət edərdi. Araz əmimin hələ o vaxtdan bir prinsipi vardı: harada işləyirsənsə işlə, amma işinin ağası ol.” (Ramiz İsmayılov – qardaşı oğlu, Qərbi Azərbaycan İcması Sumqayıt Nümayəndiliyinin sədri)
“Araz müəllim hər bir müəllim ilə səmimi münasibət saxlayar, vəzifə borcunu vicdanla və namusla yerinə yetirərdi.”
(Əlfixan Məmmədov tanınmış pedaqoq)
Araz İsmayılov ömrünü təhsilin inkişafına həsr etmiş görkəmli pedaqoqlardan idi. O, pedaqoji fəaliyyəti ilə yanaşı, həm də maarifçilik ideyalarının təbliğində mühüm rol oynamışdır.
Təhsil Nazirliyi Araz müəllimi Çexoslovakiya, Ukrayna və Rusiyaya təcrübə mübadiləsinə göndərmişdi. Uzun illər pedaqoji fəaliyyətinə görə o, “Qabaqcıl maarif xadimi” fəxri adına layiq görülmüşdü. Dəfələrlə Respublika Müəllimlər Qurultayına nümayəndə seçilmiş, iki dəfə şəhər Sovetinin deputatı, həmçinin iki dəfə şəhər partiya komitəsi plenumunun üzvü kimi ictimai fəaliyyətini də uğurla davam etdirmişdi.
1983-cü ildə Araz İsmayılov şəhər Maarif şöbəsinin müdiri vəzifəsinə irəli çəkildi. Bu vəzifə son dərəcə məsuliyyətli və çətin idi. On minlərlə şagird və müəllimin, əlliyə yaxın gündüz və axşam məktəbinin, uşaq bağçalarının və peşə məktəblərinin fəaliyyətinə rəhbərlik etmək böyük idarəçilik bacarığı tələb edirdi. Lakin qazandığı zəngin təcrübə, geniş dünyagörüşü və yenilikçi yanaşması ona bu vəzifənin öhdəsindən layiqincə gəlməyə imkan verdi.
Bu gün də Araz müəllimin təhsil şöbəsinə rəhbərlik etdiyi dövrdə gördüyü işlər Sumqayıtın minlərlə sakininin yaddaşında yaşayır.
(Əlixan Məmmədov, tanınmış pedaqoq)
“Onun əsas məqsədi müstəqil Azərbaycanın təhsil sistemində yeni təlim texnologiyalarının tətbiqinə dəstək vermək, müəllim-şagird münasibətlərinin sağlam əsaslar üzərində qurulmasına nail olmaq, valideyn-müəllim-şagird ünsiyyətinin düzgün istiqamətdə inkişafına xidmət etmək idi.”
(Niyaz Süleymanov, tanınmış pedaqoq)
1988-ci ildə Araz müəllim maarif müdirliyindəki vəzifəsindən uzaqlaşdı. 1989-cu ildə isə şəhərin 16 nömrəli məktəbinə direktor təyin olundu və fəaliyyətini burada davam etdirdi. Bu dövr ölkədə siyasi gərginliyin artdığı, iqtisadi çətinliklərin yaşandığı, erməni təxribatlarının qədim Azərbaycan torpaqlarına qarşı yönəldiyi mürəkkəb illərə təsadüf edirdi. Belə bir dövrdə məktəbə rəhbərlik etmək və təhsil ocağını qabaqcıl məktəblər sırasına çıxarmaq asan deyildi. Lakin Araz müəllimin peşəsinə olan sonsuz sevgisi, gələcək kadrların yetişməsinə verdiyi böyük önəm və fədakarlığı bütün çətinliklərin öhdəsindən gəlməyə imkan verdi.
Onun ictimai nüfuzu və şəxsi əlaqələri heç vaxt şəxsi maraqlara deyil, məktəbin inkişafına xidmət edirdi. Məktəb təmir olundu, texniki təminat gücləndirildi, tədrisin keyfiyyəti yüksəldi və uğur göstəriciləri xeyli artdı.
“Həmişə Araz müəllimin dəyərli məsləhətlərinə qulaq asmışam və bunun faydasını görmüşəm. O, böyük vəzifələrdə çalışsa da, müəllimlik peşəsinə daim sadiq qalmışdı. Onun dərs dediyi 9-10-cu siniflərdə açıq dərslərdə iştirak etmişəm. Bir müəllim və məktəb direktoru kimi qabaqcıl iş təcrübəsi öyrənilmiş və şəhər üzrə yayılması qərara alınmışdı. Maarif şöbəsində rəhbər işlədiyi vaxtlarda bir çox gənc müəllimin işlə təmin olunmasına, ailə qurmuş müəllimlərin mənzil məsələsinin həllinə də kömək göstərmişdi.”
(Hilal Əliyev, tanınmış pedaqoq)
2005-ci il mayın 9-da həyatını təhsilə və maarifçilik missiyasına həsr etmiş bir ziyalının ürəyi dayandı. Araz İsmayılov cəmi 64 il ömür sürsə də, bu ömrü mənalı və faydalı yaşadı. Onun ürəyi daim milli məfkurə, xalqın təhsil strategiyası və parlaq gələcək naminə döyünürdü. Hər bir şagirdinin uğuru onu sevindirir, gözlərində qürur və sevinc yaradırdı. Araz müəllim arxasında silinməz iz qoyub getdi – sinif otaqlarında, təhsil ocaqlarında və yetişdirdiyi yüzlərlə şagirdin fəaliyyətində. Bu gün onun idealları və maarifçilik ruhu həm doğma el-obasında, həm də yetişdirmələrinin uğurlarında yaşayır.
Gündəm24.az
