Qərbi Azərbaycan İcmasının Sumqayıt şəhər nümayəndəliyində 31 Mart – Azərbaycanlıların Soyqırımı Günü ilə əlaqədar anım tədbiri keçirilib.
Gündəm24.az xəbər verir ki, tədbirin əvvəlində Ümummilli Lider Heydər Əliyevin, Azərbaycan torpaqlarının azadlığı və ərazi bütövlüyü uğrunda canlarını fəda etmiş şəhidlərin, eləcə də 31 Mart soyqırımı qurbanlarının əziz xatirəsi bir dəqiqəlik sükutla yad edilib.
Daha sonra tədbiri giriş sözü ilə açan Qərbi Azərbaycan İcmasının Sumqayıt şəhər nümayəndəliyinin sədri Ramiz İsmayılov 1918-ci ilin mart-aprel aylarında azərbaycanlılara qarşı törədilən qətliamların xalqımızın tarixində ən ağır və faciəli səhifələrdən biri olduğunu bildirib. O qeyd edib ki, həmin hadisələr nəticəsində Bakı, Şamaxı, Quba, Qarabağ və digər bölgələrdə minlərlə günahsız azərbaycanlı amansızlıqla qətlə yetirilib, yaşayış məntəqələri dağıdılıb. Ramiz İsmayılov bu hadisələrin tarixi həqiqətlərinin gənc nəsillərə çatdırılmasının və soyqırımının dünya ictimaiyyətinə tanıdılmasının mühüm əhəmiyyət kəsb etdiyini vurğulayıb.
Tədbirdə daha sonra çıxış edən professor, filologiya elmləri namizədi Aslan Bayramov 31 Mart soyqırımının tarixi, səbəbləri və nəticələri barədə geniş məruzə ilə çıxış edib. O bildirib ki, 1918-ci ildə erməni silahlı dəstələri tərəfindən bolşevik qüvvələrinin dəstəyi ilə azərbaycanlı əhaliyə qarşı kütləvi qırğınlar törədilib. Bu hadisələr zamanı minlərlə dinc sakin qətlə yetirilib, kənd və şəhərlər dağıdılıb, mədəni və dini abidələr məhv edilib.
Aslan Bayramov qeyd edib ki, bu faciə təkcə bir günün hadisəsi deyil, uzun illər ərzində azərbaycanlılara qarşı həyata keçirilən planlı etnik təmizləmə və soyqırımı siyasətinin tərkib hissəsi olub. O, həmçinin bildirib ki, tariximizin bu qanlı səhifəsinin unudulmaması, gənc nəslə doğru şəkildə çatdırılması və beynəlxalq ictimaiyyətə təqdim olunması hər bir vətəndaşın və ziyalının mənəvi borcudur.
Tədbirdə çıxış edən Qərbi Azərbaycan İcmasının idarə heyətinin üzvü Akif Şahbazov isə qeyd edib ki, 31 Mart faciəsi Azərbaycan xalqına qarşı törədilmiş ən ağır cinayətlərdən biridir. O vurğulayıb ki, xalqımız tarix boyu üzləşdiyi bu cür faciələri unutmur və gələcək nəsillərin də bu həqiqətləri bilməsi üçün belə tədbirlərin keçirilməsi böyük əhəmiyyət daşıyır.
Tədbirin sonunda iştirakçılar soyqırımı qurbanlarının xatirəsini bir daha ehtiramla yad edərək onların ruhuna dualar oxuyublar.
