Tibor Qaspar qeyd edib ki, “keçən il baş verən etirazlar vətəndaşların öz fikirlərini bildirmək üçün demokratik hüququnun ifadəsi idi”.
Gündəm24.az xəbər verir ki, Slovakiyada təhlükəsizlik mövzusu yenidən diqqət mərkəzinə düşüb. Parlament sədrinin müavini Tibor Qaspar TASS-a verdiyi müsahibədə ölkədə hazırkı vəziyyətin sakit və nəzarət altında olduğunu bildirib, lakin bunun arxasında ciddi müşahidə və profilaktika tədbirlərinin dayandığını etiraf edib. Onun sözlərinə görə, hüquq-mühafizə və kəşfiyyat qurumları xaricdən məqsədli şəkildə qeyri-sabitlik yaratmaq üçün sistemli cəhdlər qeydə almayıb, buna baxmayaraq, Slovakiya da digər dövlətlər kimi dezinformasiya və hibrid təhdidlərin təsiri altındadır.
Qaspar ötənilki kütləvi etirazlara da toxunaraq onların demokratiyanın təbii elementi olduğunu vurğulayıb. O bildirib ki, hökumət bu hadisələri təhlükə kimi deyil, vətəndaşların söz azadlığının ifadəsi kimi qiymətləndirir və bundan sonra da ictimai dialoqa açıq qalmağın vacibliyini önə çəkir. Bratislava üçün əsas hədəf sabitliyi qorumaqla yanaşı, demokratik institutlara inamı gücləndirmək olaraq qalır.
Sədaqət Həsənova
