Tramp administrasiyası İsrail və Suriyaya sərhəd təhlükəsizliyini sabitləşdirəcək bir razılığa gəlmək üçün təzyiq göstərir.
Gündəm24.az xəbər verir ki, N12 televiziya kanalı İsrail mənbələrinə istinadən xəbər verir ki, ABŞ-ın himayəsi altında Parisdə keçirilən İsrail–Suriya danışıqlarının son mərhələsində tərəflər etimadın artırılması və təhlükəsizlik razılaşmasına nail olmaq üçün konkret addımlar atmaq barədə razılığa gəliblər. Bildirilir ki, bu razılaşma regionda uzunmüddətli sabitlik üçün mühüm mərhələ kimi qiymətləndirilir.
Mənbənin sözlərinə görə, tərəflər ABŞ Prezidenti Donald Trampın vizyonuna uyğun olaraq təhlükəsizlik sazişinə nail olmaq niyyətlərini açıq şəkildə ifadə ediblər. Bu çərçivədə danışıqların tempinin sürətləndirilməsi, görüşlərin daha tez-tez keçirilməsi və qarşılıqlı etimadı möhkəmləndirəcək mexanizmlərin yaradılması razılaşdırılıb.
Paris danışıqlarında İsrail tərəfini Vaşinqtondakı İsrail səfiri Yechiel Leiter, Baş nazirin hərbi katibi Roman Gofman və İsrail Milli Təhlükəsizlik Şurasının rəhbəri vəzifəsini icra edən Gil Reich təmsil edib. ABŞ nümayəndə heyətinə isə Suriya üzrə xüsusi nümayəndə Tom Barrak, prezidentin elçiləri Stiven Vitkoff və Cared Kuşner daxil olub. Suriya tərəfdən danışıqlarda keçid hökumətinin rəhbəri Əsəd Həsən əş-Şeybani və Baş Kəşfiyyat Xidmətinin rəhbəri Hüseyn əs-Səlam iştirak edib.
Qeyd olunur ki, Tramp administrasiyası İsrail və Suriyanı sərhəd təhlükəsizliyini sabitləşdirəcək və gələcəkdə münasibətlərin normallaşmasına yol aça biləcək razılaşmaya nail olmağa təşviq edir. Danışıqlar təxminən iki ay əvvəl fikir ayrılıqları və İsrail nümayəndə heyətinin rəhbəri Ron Dermerin istefası səbəbindən dayandırılsa da, 2025-ci ilin sonunda Prezident Tramp ilə Baş nazir Binyamin Netanyahu arasında Floridada keçirilən görüşdən sonra proses yenidən aktivləşib.
Bundan əvvəl “Əşarq Əl-Əvsat” qəzeti Tramp administrasiyasının İsrail və Suriyanı uzunmüddətli düşmənçilikdən sonra münasibətlərin normallaşmasına yol açacaq təcavüzsüzlük paktına və Suriyanın İbrahim Sazişlərinə qoşulmasına təşviq etdiyini yazmışdı. Bu proses Yaxın Şərqdə geosiyasi balansın dəyişə biləcəyi ehtimallarını daha da gücləndirir.
Sədaqət Həsənova
