Türkiyə Milli Müdafiə Nazirliyinin sözçüsü kontr-admiral Zeki Aktürk bu gün keçirilən brifinqdə bildirib ki, “Suriya istəsə, Türkiyə lazımi dəstəyi verəcək”. Bu arada, döyüşlər səbəbindən Suriyanın Hələb şəhərində bəzi məhəllələrin boşaldılması davam edir.
Gündəm24.az xəbər verir ki, Milli Müdafiə Nazirliyinin sözçüsü kontr-admiral Zeki Aktürk Hələbdəki antiterror əməliyyatını şərh edib. O bildirib ki, əməliyyat tamamilə Suriya Ordusu tərəfindən həyata keçirilir və Suriyanın təhlükəsizliyi Türkiyənin də təhlükəsizliyi üçün vacibdir. Türkiyə Suriyanın birliyi və ərazi bütövlüyü əsasında terror təşkilatlarına qarşı mübarizəsini dəstəkləyir və ehtiyac olarsa yardım göstərəcək.
Hələbdə mülki əhalinin təhlükəsiz keçidini təmin etmək üçün iki humanitar keçid açılıb, Şeyx Maqsud və Əşrəfiyyə məhəllələrindən təhlükəsiz ərazilərə təxliyə edilə biləcəklər. Təxliyə prosesinin saat 10:00-dan 13:00-dək davam etməsi gözlənilir.
6 yanvar tarixində SDF hücumlarında 1 əsgər və 5 mülki şəxs həlak olub, 31 nəfər yaralanıb. Suriya ordusu əlavə əsgərlər, tanklar və zirehli maşınlarla PKK/YPG mövqelərinə yönəlib, hədəflərin qanuni olduğunu bildirib.
Toqquşmalar səbəbindən şəhər mərkəzində rəsmi qurumlar, məktəblər və universitetlər fəaliyyətini dayandırıb, Hələb Beynəlxalq Hava Limanında uçuşlar da dayandırılıb.
Sədaqət Həsənova
