İrəvan tələsir, çünki “Tramp marşrutu”nun həyata keçirilməsi ilə bağlı bəyannamənin imzalanmasından sonra müvafiq infrastrukturun tikintisinə başlanılacaq.
Gündəm24.az xəbər verir ki, Sputnik Ermənistanın məlumatına görə, Ermənistanın Baş naziri Nikol Paşinyan Rusiyadan Ermənistandakı dəmir yolunun Azərbaycan və Türkiyə sərhədlərinə aparan hissələrinin bərpası ilə bağlı mümkün qədər tez qərar verməsini istəyib.
Paşinyan bildirib ki, bu məsələ Rusiya Prezidenti Vladimir Putinlə müzakirə olunub, həmçinin Ermənistan və Rusiya baş nazirlərinin müavinləri arasında da danışıqlar aparılıb. Onun sözlərinə görə, hazırda Rusiya tərəfinin mövqeyi gözlənilir.
Baş nazir qeyd edib ki, yanvarın 13-də Beynəlxalq Sülh və Rifah üçün Tramp Marşrutu (TRIPP) layihəsinin icrası ilə bağlı bəyanatın imzalanmasından sonra dəmir yolu xətlərinin bərpası üçün vaxt faktoru xüsusi əhəmiyyət kəsb edir. Paşinyan vurğulayıb ki, gedən proseslər qərarın mümkün qədər tez verilməsini tələb edir.
Söhbət Ermənistanı Azərbaycan, Naxçıvan və Türkiyə ilə birləşdirən İcevan, Yerasx və Axurik dəmir yolu hissələrindən gedir. Sovet dövründə inşa edilən bu xətlər 1980-ci illərin sonlarından etibarən fəaliyyət göstərmir.
Qeyd edək ki, son iki ildə Ermənistan hakimiyyətinin Azərbaycan və Türkiyəyə aparan dəmir yolu xətlərinin bərpası ilə bağlı mövqeyi nəzərəçarpacaq dərəcədə dəyişib.
Sədaqət Həsənova
