Xarici işlər naziri Ceyhun Bayramov dekabrın 26-da keçirilən mətbuat konfransında Bakıda “Rus Evi”nin bağlanması məsələsindən danışıb.
Nazirin sözlərinə görə, məsələyə dair Moskva nümayəndələri ilə sonuncu təmas bir neçə həftə öncə olub. Ceyhun Bayramov ləğvetmə prosesinin tam başa çatdığını və “Rus Evi” ilə bağlı yarımçıq heç bir məsələnin qalmadığını vurğulayıb.
Maraqlıdır ki, Rusiya KİV-də zaman-zaman Bakıda sözügedən mərkəzin yenidən açılacağına dair məlumatlar yayılır.
Gundem24.az xəbər verir ki, Globalinfo.az-a danışan siyasi şərhçi Elnur Ənvəroğlu bildirib ki, əsas məsələ Azərbaycan tərəfinin “Rus Evi”nin bağlanması ilə bağlı bütün proseduru artıq tamamlaması və mövzunu rəsmi şəkildə bitirməsidir.
“Rusiya ilə bu barədə son təmaslar bir neçə həftə əvvəl olub və ləğvetmə prosesi başa çatıb. Yəni bu tip mədəni və informasiya mərkəzləri adətən ölkələr arasında “yumşaq güc” əlaqəsi rolunu oynayır. Məsələn, dil, mədəniyyət və informasiya mübadiləsi vasitəsilə əlaqələri saxlamaq üçün istifadə olunur. Azərbaycanın mövqeyi isə belə strukturların yalnız qanun çərçivəsində və qarşılıqlı razılaşmalar əsasında fəaliyyət göstərməsidir.
XİN başçısının fikirlərindən belə qənaətə gəlmək olar ki, Azərbaycan artıq bu konkret “yumşaq güc” mərkəzinin Bakıdakı fəaliyyətini arzuolunan hesab etmir.
Elnur Ənvəroğlu
Bütün bunlara baxmayaraq, Azərbaycan diplomatları balansı qorumağa çalışır, yəni rəsmi Bakı Moskva ilə münasibətləri tamamilə kəsmir. Ticarət, enerji, nəqliyyat və regional təhlükəsizlik kimi sahələrdə əlaqələr davam edir.
Ümumiyyətlə, “Rus Evi” kimi müəssisə və institutların fəaliyyətinin məhdudlaşdırılması münasibətləri kəsmək deyil, Rusiyanın “yumşaq güc” siyasətini neytrallaşdırmaq məqsədi daşıyır. Bu, Azərbaycana suveren və müstəqil dövlət olaraq diplomatik əlaqələrini genişləndirmək imkanı verir. Çünki Azərbaycan öz milli qanunlarını və suverenliyini müdafiə etdiyini göstərməklə yanaşı, digər diplomatik və iqtisadi əlaqələrdə də balans tapmağa çalışır. Biz bunu əlaqələrdə bir növ çətinlik əlamətləri də adlandıra bilərik, lakin proseslər münasibətlərin tamamilə pozulduğunu göstərmir”.
