Gündəm24.az xəbər verir ki, Sumqayıt şəhərinin əyləncə mərkəzlərindən birində Qərbi Azərbaycan İcmasının təşkilatçılığı və Cavid Ticarət Mərkəzinin dəstəyi ilə “Qəlbimizdə Yaşayanlar və Qayıdışın Övladları” adlı tədbir keçirilib. Tədbirdə şəhid övladları, şəhid ailələri, ictimaiyyət nümayəndələri və gənclər iştirak ediblər.
Tədbiri giriş sözü ilə açan Qərbi Azərbaycan İcmasının Sumqayıt şəhər nümayəndəsi Ramiz İsmayılov Qərbi Azərbaycan İcmasının İdarə Heyətinin sədri və millət vəkili Əziz Ələkbərlinin salamlarını və xoş arzularını iştirakçılara çatdırıb. O, çıxışında şəhid övladlarına göstərilən diqqət və qayğıdan, torpaqlarımız uğrunda canından keçmiş qəhrəmanların əziz xatirəsinə olan ehtiramdan danışıb. Ramiz İsmayılov həmçinin bu cür tədbirlərdə hər zaman onların yanında olan, dəstəyini əsirgəməyən və xeyriyyəçilik fəaliyyəti ilə tanınan Nizami İsgəndərovun təbrik və xoş sözlərini çatdırıb.
Daha sonra Sumqayıt Şəhər İcra Hakimiyyəti başçısının birinci müavini Teymur Səmədov çıxış edərək şəhər rəhbəri Zakir Fərəcovun salamlarını və ehtiramını şəhid ailələrinə çatdırıb. O qeyd edib ki, dövlət hər zaman şəhid ailələrinin yanında olub, onların rifahının təmin olunması prioritet məsələdir və şəhid övladları xalqımızın ən böyük əmanətidir.
Ardınca Qərbi Azərbaycan İcmasının Sumqayıt nümayəndəliyinin Tağıyev qəsəbə icma sədri Mehriban İsmayılova çıxış edərək icmanın fəaliyyət istiqamətləri, həyata keçirilən layihələr, şəhid ailələrinə ayrılan sosial dəstək proqramları və icmanın bu istiqamətdəki davamlı fəaliyyəti barədə ətraflı məlumat verib.
Həmçinin tədbirdə şəhid Quliyev Şəhriyarın xanımı Quliyeva Pərvin çıxış edərək təşkilatçılara təşəkkürünü bildirib və qeyd edib ki, şəhid ailələrinə olan bu cür diqqət və qayğı cəmiyyətdə şəhidlərə olan hörmət və ehtiramın bariz nümunəsidir.
Tədbirin davamında uşaqlar üçün xüsusi əyləncə proqramı təşkil olunub. Klounlar, nağıl qəhrəmanları və animatorlar uşaqlara unudulmaz anlar yaşadıblar. Balacalar müxtəlif rəqs və oyunlarda iştirak edərək günlərini həm əyləncəli, həm də səmərəli keçiriblər.
Sonda şəhid övladlarına hədiyyələr təqdim olundu və xatirə şəkli çəkdirilib. Tədbir həmçinin cəmiyyətimizdə şəhid ailələrinə və onların övladlarına göstərilən diqqət və qayğının simvolu olmaqla yanaşı, iştirakçılarda xoş və mənalı xatirələr yaratdı.
Ali Baş Komandan İlham Əliyevin siyasi iradəsi həm Qərbi Azərbaycan həsrətini, həm 44 günlük müharibənin şərəfini, həm də şəhid ailələrinin müqəddəs əmanətini bir amal altında birləşdirərək, bu torpağın övladlarına güc, ruh və qürur bəxş edir.
