İranın Ali Lideri Donald Trampın mümkün hərbi müdaxilə ilə bağlı təhdidlərini gülünc adlandırıb.
Gündəm24.az xəbər verir ki, İran öz ərazisində agentlərin mövcudluğuna dözməyəcək. Bu barədə İranın Ali Rəhbəri Ayətullah Əli Xamenei ölkəni bürüyən kütləvi etirazlarla bağlı şərhində bildirib. Onun sözlərinə görə, əvvəlki gecə Tehranda və bir neçə digər şəhərdə fəaliyyət göstərən “vandal qruplar” ABŞ prezidentinin maraqları naminə hərəkət edərək hökumət binalarını dağıdıblar. Xamenei vurğulayıb ki, bu cür addımlar ölkədə sabitliyi pozmaq məqsədi daşıyır və xarici dəstək qazanmaq niyyəti ilə həyata keçirilir.
Ali Rəhbər bildirib ki, “İslam Respublikası qırğınçılara güzəştə getməyəcək və İran öz ərazisində agentlərin olmasına dözməyəcək”. O, ABŞ prezidenti Donald Trampın etirazların zorakılıqla yatırılması halında hərbi müdaxilə ilə bağlı səsləndirdiyi təhdidləri absurd adlandırıb və Amerika liderinə ölkəsinin daxili problemlərinə diqqət yetirməyi tövsiyə edib.
Xamenei çıxışında İslam Respublikasının öz prinsiplərindən geri çəkilməyəcəyini də xüsusi vurğulayıb. O, tarixdə qədim fironlardan tutmuş Rza Şah və Məhəmməd Rzaya qədər bir çox “təkəbbürlü hökmdarların” güclərinin zirvəsində devrildiyini xatırladaraq, İranın hazırkı düşmənlərini də oxşar aqibətin gözlədiyini iddia edib.
Qeyd edək ki, dünən gecə İranda son günlərin ən kütləvi etirazları baş verib və ölkə daxilində internet bağlantısı məhdudlaşdırılıb. Etirazlar 2025-ci ilin dekabr ayının sonlarında İran rialının kəskin devalvasiyası fonunda başlayıb. Əvvəlcə valyuta məzənnəsindəki dalğalanmaların topdan və pərakəndə satış qiymətlərinə təsiri əsas narazılıq mövzusu olsa da, sonradan bir neçə şəhərdə aksiyalar polislə toqquşmalara çevrilib və şüarlar ölkədəki mövcud siyasi sistemi hədəf alan siyasi xarakter alıb.
Sədaqət Həsənova
