Xudat şəhərində “Qayalı” marketin qarşısında yerləşən piyada keçidi uzun müddətdir yararsız vəziyyətdədir.
Gündəm24.az -a bu barədə Xudat sakinləri tərəfindən çoxsaylı müraciətlər daxil olub.
Göndərilən video kadrlardan aydın olur ki, “Qayalı” marketin qarşısında yerləşən piyada keçidi tamamilə yararsız vəziyyətdədir.
Zolaqlar silinib, nişanlanma görünmür, sürücülər üçün xəbərdarlıq effekti yoxdur.
Ən narahatedici məqam isə odur ki, bu yoldan hər gün məktəbə gedib-gələn azyaşlı uşaqlar istifadə edir.
Silinmiş zolaqlar, görünməyən nişanlanma və sürücülərin sürəti azaltmaması məktəblilərin həyatını real təhlükə altına qoyur. Ərazi faktiki olaraq nəzarətsiz və təhlükəli vəziyyətdədir.
Problemlə bağlı Qayalı Marketdən bildirilib ki, dəfələrlə rəsmi şəkildə Azərbaycan Yerüstü Nəqliyyat Agentliyinə müraciətlər ünvanlanıb.
Lakin bütün müraciətlərə baxmayaraq, vəziyyət dəyişməz olaraq qalır. Əgər sabah bir məktəbli avtomobil altında qalsa, bunun məsuliyyəti kimə aid olacaq?
