2005-ci ildə “Mizuho Securities” adlı investisiya şirkətində çalışan bir treyder “J-Com” adlı yeni bir şirkətin səhmlərini satarkən böyük bir səhv edib. O, əslində 1 ədəd səhmi 610 min yendən satmaq istəsə də, təsadüfən 610 min səhmi 1 yendən satışa çıxarıb.
Gündəm24.az News24.az-a istinadən xəbər verir ki, Kotegawa isə bu klaviatura səhvini saniyələr içində fərq edib və dərhal alış əməliyyatı həyata keçirib. Əməliyyat ləğv olunmamışdan əvvəl milyonlarla dollar dəyərində səhmləri demək olar ki, pulsuz qiymətə alan Kotegawa, təkcə bu əməliyyatdan bir neçə dəqiqə ərzində 17 milyon dollar qazanc əldə edib. Bu hadisə Yaponiyanın birja tarixinə düşüb, lakin Kotegawa-nın uğuru təkcə bu “şanslı” səhvlə məhdudlaşmayıb.
Kotegawa-nın yanaşması olduqca sadədir: “Ən çox dəyərdən düşmüş, ən az sevilən səhmləri al. Amma zamanlamanı qrafiklərə əsasən müəyyən et.”
Yəni o, şirkətin maliyyə hesabatına yox, qiymət hərəkətlərinə baxır. Texniki analiz vasitəsilə həddindən artıq satılmış səhmləri izləyir və trendin dönüş anlarından qazanc götürür. Kotegawa adətən aldığı səhmləri 2–6 gün arası saxlayır, amma qrafiklərdə fürsət davam edərsə bu müddət uzana bilər.
O, həmçinin “ayı bazarlarında” (yəni bazarların eniş dövründə) ticarət etməyin daha asan olduğunu deyir — çünki bu zaman bazarda dəyişkənlik artır və qısa müddətli yüksəlişlərdən böyük qazanc əldə etmək mümkündür.
KOTEGAWA-DAN 4 QIZIL MƏSLƏHƏT
Cəmi 8 il ərzində birjada 13 min dollarlıq kapitalını 150 milyon dollardan çox məbləğə çatdıran Kotegawa, izləyicilərinə bu 4 əsas tövsiyəni verir:
1. Diqqəti cəmlə
Kotegawa eyni anda 30–70 səhmlə əməliyyat aparır, ümumilikdə isə 600–700 səhmlik siyahını daimi izləyir və diqqətini heç vaxt yayındırmır.
2. Ticarəti oyun kimi gör
O, birjanı sıfır nəticəli oyun hesab edir: bir qazanan varsa, bir də uduzan var. Onun məqsədi pulu qazanmaq yox, oyunu düzgün oynamaqdır.
3. Nəticəyə deyil, prosesə fokuslan
“Pul qazanmağa həddindən artıq önəm versən, uda bilməzsən.”
Əgər əməliyyat mənfəətlə bitsə də, strategiyaya uyğun deyilsə, Kotegawa bunu uğursuz hesab edir.
4. Sadə yaşa
150 milyon dollardan çox sərvətinə baxmayaraq, o, lüks həyatdan uzaq yaşayır. Qazanc dövründə aldığı yeganə bahalı şey iki ədəd oyun konsolu olub. Tokioda sadə bir mənzildə yaşayır və kiçik bir ofisi var:
“Lüks içində yaşasan, o həyatı qorumaq üçün riskli qərarlar verməyə məcbur olarsan.”
Kotegawa qısa zamanda böyük qazanc əldə etsə də, intizamı və təvazökarlığı ilə investisiya dünyasında nümunə sayılır. Onun şüarı belədir:
“Birjada məqsəd pul qazanmaq deyil, oyunu düzgün oynamaqdır. Pul onsuz da düzgün oynayanın olur.”
