ABŞ Ukraynaya Rusiyanın enerji infrastrukturuna — neft emalı zavodları və digər strateji obyektlərə raket zərbələri endirmək üçün kəşfiyyat məlumatı ötürəcək.
Gündəm24.az xəbər verir ki, bu barədə The Wall Street Journal (WSJ) mənbələrə istinadən yazıb.
Məlumata görə, Vaşinqton NATO müttəfiqlərindən də Kiyevə analoji dəstək göstərmələrini xahiş edib. Bundan əlavə, ABŞ Ukraynaya “Tomaqavk” qanadlı raketləri və “Barakuda” tipli sursatların göndərilməsi imkanını nəzərdən keçirir. Lakin onların çatdırılması ilə bağlı hələlik yekun qərar qəbul edilməyib.
Moskva bu iddialara sərt reaksiya verib. Rusiyanın BMT-dəki daimi nümayəndəsi Vasili Nebenzya xəbərdarlıq edərək bildirib ki, ABŞ Kiyevi “Tomaqavk” raketləri ilə təchiz etsə, Moskva buna cavab tapacaq.
Bundan əvvəl Rusiya xarici işlər naziri Sergey Lavrov qeyd etmişdi ki, “Tomaqavklar” Ukraynaya verilsə belə, bu, cəbhədə vəziyyəti dəyişməyəcək. Kreml isə bu addımı Qərbin müharibədə birbaşa iştirakının dərinləşməsi kimi qiymətləndirir.
Aliyə İlkin
Gündəm24.az
