Xəbər verdiyimiz kimi, “AzerGold” Qapalı Səhmdar Cəmiyyətinin Müşahidə Şurasının tərkibində dəyişiklik edilib.
Bununla bağlı Prezident İlham Əliyev sərəncam imzalayıb. Sərəncama əsasən, Maliyyə Nazirliyi Aparatının İnvestisiya layihələrinin və infrastrukturunun maliyyəsi şöbəsinin müdiri Mehman İsmayılovun adı şuranın tərkibindən çıxarılıb.
Bundan başqa, Maliyyə Nazirliyi Aparatının Maliyyə xidmətləri və dövlət müəssisələri üzrə siyasət şöbəsinin müdiri Gündüz Əliyev Müşahidə Şurasının üzvü olub. Sərəncam 23 sentyabr 2026-cı ildə imzalanıb. Marqarita pizza
Bəs “AzerGold”un Müşahidə Şurasına daxil edilən Gündüz Əliyev kimdir və onun bundan əvvəlki fəaliyyəti hansı istiqamətləri əhatə edib?
Gündüz Əliyevin adı uzun illərdir Azərbaycanın maliyyə və sığorta sektorunda dövlət siyasətinin formalaşdırılması ilə bağlı fəaliyyətlərdə keçir.
2019-cu ildə o, Maliyyə Nazirliyinin Maliyyə xidmətləri üzrə siyasət və büdcə proqnozu sektorunda şöbə müdirinin müavini vəzifəsində çalışıb. Həmin dövrdə İslam maliyyəsi, bankçılıq və sığorta ilə bağlı keçirilən tədbirlərdə Maliyyə Nazirliyinin nümayəndəsi kimi çıxış edib.
Onun diqqət çəkən fəaliyyət istiqamətlərindən biri də sığorta sektorudur. 2019-cu ildə İslam maliyyəsi ilə bağlı tədbirdə Gündüz Əliyev sığorta və təkrarsığorta mexanizmlərinin İslam prinsipləri baxımından xüsusiyyətləri barədə çıxış edib və “Takaful” modelinin mahiyyəti ilə bağlı təqdimat verib.
Gündüz Əliyevin karyerasında diqqətçəkən məqamlardan biri də “Azərsığorta” ilə bağlıdır.
2022-ci ildə Prezidentin sərəncamı ilə “Azərsığorta” ASC-nin Direktorlar Şurasının tərkibi təsdiqlənərkən Gündüz Əliyev də şuranın üzvlərindən biri təyin olunub
Həmin sərəncamda o, Maliyyə Nazirliyinin Maliyyə xidmətləri üzrə siyasət şöbəsi müdirinin müavini kimi təqdim edilib.
Bu fakt onun yalnız Maliyyə Nazirliyinin daxilində deyil, dövlətə məxsus maliyyə institutlarının idarəetmə strukturlarında da təmsil olunduğunu göstərir.
Gündüz Əliyevin adı 2026-cı ilin əvvəlində daha bir mühüm maliyyə institutu ilə bağlı gündəmə gəlib.
Yanvarın 14-də Əmanətlərin Sığortalanması Fondunun Himayəçilik Şurasının tərkibində dəyişiklik edilib. Maliyyə Nazirliyinin Maliyyə xidmətləri üzrə siyasət şöbəsinin müdiri Ziyəddin Allahverdiyevi onun müavini Gündüz Əliyev əvəz edib.
Hazırda Fondun rəsmi məlumatında da Gündüz Əliyev Himayəçilik Şurasının üzvü kimi göstərilir və vəzifəsi Maliyyə Nazirliyi Aparatının maliyyə xidmətləri üzrə siyasət şöbəsinin müdiri kimi qeyd olunur.
Gündüz Əliyevin karyerasında 2026-cı il xüsusi mərhələ olub.
İlin əvvəlində o, Maliyyə xidmətləri üzrə siyasət şöbəsinin müdir müavini kimi təqdim edilirdi. Daha sonra şöbəyə rəhbərlik edən Ziyəddin Allahverdiyevin Himayəçilik Şurasındakı üzvlüyünün dayandırılması fonunda Gündüz Əliyevin adı artıq şöbə rəhbərliyi ilə əlaqələndirildi.
Hazırda Maliyyə Nazirliyinin strukturunda onun vəzifəsi Maliyyə xidmətləri və dövlət müəssisələri üzrə siyasət şöbəsinin müdiri kimi göstərilir.
Bu vəzifənin adı da təsadüfi deyil. Çünki Maliyyə Nazirliyinin fəaliyyətinin yenilənməsi ilə bağlı 2025-ci ilin sonunda qəbul edilən fərmana əsasən, Nazirliyin dövlət müəssisələri ilə bağlı maliyyə nəzarəti və monitorinq funksiyaları genişləndirilib. Nazirlik yanında Dövlət Müəssisələrinin Monitorinqi Agentliyi yaradılıb. Agentlik dövlət müəssisələrinin büdcə layihələrini, proqnozlarını, gəlir-xərc smetalarının icrasını monitorinq edir və göstəriciləri təhlil edir.
Gündüz Əliyevin yeni təyinatı onun fəaliyyət dairəsinin dövlət müəssisələrinin idarəetməsi istiqamətində də davam etdiyini göstərir.
Bu gün – Prezidentin 23 sentyabr 2026-cı il tarixli sərəncamı ilə “AzerGold” QSC-nin Müşahidə Şurasının əvvəlki üzvü, Maliyyə Nazirliyi Aparatının İnvestisiya layihələrinin və infrastrukturunun maliyyəsi şöbəsinin müdiri Mehman İsmayılovun adı çıxarılıb və onun yerinə Gündüz Əliyevin adı daxil edilib.
Beləliklə, Gündüz Əliyev hazırda bir neçə mühüm istiqamətdə – maliyyə xidmətləri siyasəti, əmanətlərin sığortalanması və dövlət şirkətlərinin korporativ idarəetməsi sahələrində təmsil olunur.
Onun karyera xəttinə nəzər saldıqda isə Maliyyə Nazirliyində şöbə müdirinin müavinliyindən şöbə müdiri vəzifəsinə, paralel olaraq isə dövlətə məxsus maliyyə institutlarının və şirkətlərin idarəetmə strukturlarına qədər uzanan bir fəaliyyət trayektoriyası görünür.
