“Tramp layihəsi ləğv olunacaq” iddiası real geosiyasi reallıqlardan daha çox, müəyyən dairələrin regionla bağlı növbəti manipulyasiya və arzuolunanı reallıq kimi qələmə vermək cəhdidir. Erməni əsilli rusiyalı politoloq Karina Gevorkyanın Ermənistanın Azərbaycanla sülh müqaviləsi və bəhs etdiyi layihələr fonunda “fərqli stullarda oturduğunu” iddia etməsi, investorların geri çəkildiyini və xüsusən İranın buna icazə verməyəcəyini vurğulaması birbaşa rəsmi Bakının regional kommunikasiyaların açılması istiqamətindəki uğurlu siyasətinə kölgə salmaq məqsədi daşıyır.
İranın Zəngəzur dəhlizi və regional layihələrə qarşı ritorik çıxışları fonunda belə iddiaların dövriyyəyə buraxılması, əslində regional inteqrasiyanı əngəlləmək istəyən Rusiyadakı müəyyən ermənipərəst və revanşist qüvvələrin maraqlarına xidmət edir. Reallıq isə ondan ibarətdir ki, Azərbaycanın təşəbbüskarı olduğu və regionun simasını dəyişəcək bu nəhəng layihələr həm iqtisadi, həm də strateji baxımdan kifayət qədər möhkəm əsaslara malikdir və hansısa kənar siyasi bəyanatlarla iflasa uğrayacaq xarakterdə deyil.
Məsələ ilə bağlı NOCOMMENT.az-a danışan professor, politoloq Qabil Hüseynli qeyd edib ki, bu cür iddialar heç bir ciddi iqtisadi və ya siyasi əsasa söykənmir, sadəcə olaraq regionda yaranmış yeni reallıqları həzm edə bilməyən qüvvələrin propaqandasıdır: “Erməni politoloqların və Rusiyadakı müəyyən analitik mərkəzlərin ortaya atdığı bu tezislər real vəziyyəti əks etdirmir. Zəngəzur dəhlizi və regionda nəzərdə tutulan nəqliyyat-kommunikasiya xətləri beynəlxalq səviyyədə dəstəklənən, böyük güclərin də marağında olan layihələrdir. Kimlərinsə ‘investorlar geri çəkilir’ iddiası tamamilə uydurmadır və heç bir rəsmi təsdiqi yoxdur”. Onun sözlərinə görə, İran amilindən bu şəkildə istifadə edilməsi də regionda süni gərginlik yaratmaq və Azərbaycanın geosiyasi çəkisini azaltmaq cəhdindən başqa bir şey deyil: “İranın müəyyən narahatlıqları və bəyanatları olsa da, Tehran rəsmi Bakı ilə regional əməkdaşlıq formatlarında, o cümlədən Araz dəhlizi layihəsində yaxından iştirak edir. Gevorkyan və onun arxasındakı qüvvələr İranı qorxuducu bir faktor kimi qabağa verərək, əslində öz daxili arzularını, yəni Ermənistanın layihələrdən kənarda qalmasının yaratdığı qorxu və rəşki dilə gətirirlər”.
Professor vurğulayıb ki, investorların geri çəkilməsi barədə yayılan şayiələr də regional layihələrin beynəlxalq nüfuzuna zərbə vurmaq məqsədi güdən dezinformasiya kampaniyasının tərkib hissəsidir: “Azərbaycanın apardığı qətiyyətli xarici siyasət və regionda təhlükəsizliyin əsas qarantı rolunda çıxış etməsi, böyük maliyyə institutlarının və dövlətlərin bu coğrafiyaya olan marağını azaltmır, əksinə artırır. Gevorkyan kimi Rusiyada məskunlaşmış erməni əsilli şərhçilərin İranı Ermənistanın ‘xilaskarı’ və layihələrin ‘əngəlləyicisi’ kimi təqdim etməsi, İrəvanın öz suverenliyini qoruya bilməməsinin və kənar güclərin əlində oyuncağa çevrilməsinin növbəti etirafıdır. Zəngəzur dəhlizi reallaşacağı təqdirdə regionda tamamilə yeni bir iqtisadi mühit yaranacaq ki, bundan həm Ermənistan, həm də regionun digər dövlətləri faydalana bilər; lakin revanşist psixologiya bu potensialı görməkdən imtina edərək subyektiv iddialarla gündəm yaratmağa çalışır. Sonda görünən odur ki, regional layihələrin ləğvi barədə səsləndirilən fikirlər geosiyasi təhlildən uzaq, sadəcə olaraq Azərbaycanın diplomatik və iqtisadi qələbələrini həzm edə bilməyən dairələrin növbəti uğursuz arzusudur”.
