Bakıda dönər ustası 40 kiloqram əti zibilliyə atdı: “Bunu müştəriyə rəva görmürəm” – FOTOLAR

“Bakupost” xəbər verir ki, sahibkarın sözlərinə görə, dönər hazırlamaq üçün aldığı ətdə toyuq tükünə bənzər liflər, sümük parçaları və qığırdaq qalıqları aşkarlanıb.

Y.Qardaşzadə “Bakupost”a bu halla dəfələrlə qarşılaşdığını, şirkətə müraciətlərinin isə nəticəsiz qaldığını bildirib. O, məhsula görə ödədiyi pulun geri qaytarılmasını tələb etsə də, dəymiş zərərin qarşılanmadığını deyib.

Sahibkarın sözlərinə görə, üç ay əvvəl açdığı obyektə yaxın olduğu üçün əvvəlcə həmin şirkətdən ət alıb. Məhsulun keyfiyyətindən narazı qaldıqdan sonra başqa şirkətə üz tutsa da, bəzi vaxtlarda yenidən “Halal Food” MMC-dən məhsul almağa məcbu olub.

“Bu problemlə dəfələrlə qarşılaşmışam. Şirkətə bildirəndə yola verirlər, dəymiş zərəri qarşılamaqdan imtina edirlər. Şəkillər müxtəlif vaxtlarda çəkilib. Mən bir sahibkar kimi bu əti müştəriyə verə bilmərəm. Əgər siz özünüzə, yaxud övladınıza rəva görürsünüzsə, almağa davam edin.

İndiyədək 40 kiloqram ət ziyana gedib. Mən də həmin məhsulun pulunu tələb etmişəm. Əti müştərilərə satmamışam, tullamışam. Şikayət edəndə deyirlər ki, yəqin, səhv olub. Bəs bu səhv dəfələrlə necə təkrarlana bilər? Sexdə belə hal bir dəfə, maksimum iki dəfə baş verə bilər, amma dəfələrlə təkrarlanır. Mən istəmirəm ki, başqaları da bu əti alsın. Şirkət rəhbərliyi bildirir ki, məhsulu məhz onlardan aldığımı sübut etməliyəm. Deyir ki, bu, bəlkə də başqa yerdən aldığın ətdir. Ancaq mən bu məhsulu onlardan almışam. Başqa yeri niyə əsassız yerə şikayət edim ki? Əgər problemin onların məhsulundan qaynaqlandığını görürəmsə, bunu niyə başqa şirkətin adına çıxarım?” – deyə Y.Qardaşzadə bildirib.

“Sadəcə pul vermədiyimə görə paylaşım edilib. Xahiş edirəm, AQTA-ya müraciət edin, araşdırsın. Qanun nə deyirsə, odur”.