Bakıdakı maşın bazarının Ağdama köçürüləcəyi ilə bağlı yayılan xəbərlər ictimaiyyətdə müzakirələrə səbəb olub. Bildirilir ki, bu, təkcə Azərbaycanın deyil, bütün Cənubi Qafqazın ən böyük və nüfuzlu avtomobil mərkəzlərindən birinə çevrilə bilər. Həmçinin bəziləri düşünür ki, alıcı-satıcı axınının azalması, bazarın Bakıdan kənara köçürülməsi fonunda müəyyən risklərin yaranması mümkündür. Yəni həm ciddi tərəfdarlar, həm də əleyhdarlar var.
Bakıdakı maşın bazarının Ağdama köçürülməsi niyə faydalıdır? Yaxud əks arqument varmı?
Gündəm24.az Globalinfo.az-a istinadən xeber verir ki, nəqliyyat məsələləri üzrə ekspert Aslan Əsədov deyib ki, sözügedən addımın ölkə üçün faydaları böyükdür:
“Ağdamda daha böyük və müasir bazar qurmaq mümkündür. Nəticədə Bakıdakı dar, köhnə infrastruktur məhdudiyyətləri aradan qalxar. Eyni zamanda maşın bazarına görə həftəsonu ciddi sıxlıq yaranır. Bu yük köçürülmə ilə paytaxtdan kənara çıxmış olar. Lakin bazarın aktivliyi qismən azalacaq. Çünki alıcı üçün uzaq məsafəni qət etmək çətin görünür. Bütün hallarda maşın almaq istəyənlər, ora getmək məcburiyyətində qalacaqlar. Həm də onlayn satışlar mövcuddur. Ola bilər ki, bazar orada yerləşsin, amma seçim şəxsin istəyinə görə Bakıdan və ya digər bölgələrdən qiyabi qaydada aparılsın”.
Aslan Əsədov
Ekspert bildirib ki, burada söhbət təkcə avtomobil bazarının açılmasından getmir:
“Bu ərazidə notariat xidməti, Dövlət Yol Polisinin texniki baxış bölməsi və alqı-satqının rəsmiləşdirilməsi üçün zəruri olan digər strukturların da fəaliyyəti məqsədəuyğun olardı. Belə islahatlar həm də bölgələrin kompleks inkişafına xidmət edəcək. Proses həm məşğulluq, həm də bölgəyə investisiya deməkdir. Ümumilikdə, bu cür təşəbbüslər regionların inkişafına mühüm töhfə verir”.
Qeyd edək ki, Bakıdakı maşın bazarının köçürüləcəyi haqda məlumatda belə əsaslandırılır ki, avtomobil bazarı və logistika infrastrukturunun qurulması Ağdamı ölkənin dinamik iqtisadi zonalarından birinə çevirəcək. Həmçinin bura Cənubi Qafqazda aparıcı avtomobil ticarət mərkəzi olacaq, region ölkələri ilə avtomobil və ehtiyat hissələri ticarətində tranzit rolunu gücləndirəcək.
Lakin noyabrın 25-də Ağdam Rayon İcra Hakimiyyətindən Qafqazinfo.az-ın sorğusuna cavab olaraq bildirilib ki, RİH-ə aid hissədə belə bir bazarın inşası nəzərdə tutulmayıb.
