Qəzetin məlumatına görə, BƏƏ rəsmiləri artıq İrana bu cür tədbirlərin görülməsi ehtimalı barədə şəxsi məlumat veriblər.
Gündəm24.az xəbər verir ki, Yaxın Şərqdə artan gərginlik fonunda Birləşmiş Ərəb Əmirliklərinin İranla bağlı mümkün addımı diqqət çəkib. The Wall Street Journal qəzetinin yaydığı məlumata görə, BƏƏ öz ərazisində yerləşən İran aktivlərinin dondurulması ehtimalını nəzərdən keçirir. Belə bir qərarın qəbul olunacağı halda İranın xarici valyutaya çıxışı və beynəlxalq ticarət şəbəkələri ilə əlaqələri ciddi şəkildə məhdudlaşa bilər.
Məlumatda qeyd olunur ki, məsələ ilə bağlı müzakirələr artıq yüksək səviyyədə aparılır və müxtəlif sanksiya mexanizmləri qiymətləndirilir. Mənbələrin bildirdiyinə görə, BƏƏ rəsmiləri belə bir addımın mümkünlüyü barədə İran tərəfini əvvəlcədən qeyri-rəsmi kanallar vasitəsilə məlumatlandırıblar.
Analitiklər hesab edir ki, bu qərar reallaşarsa, regiondakı iqtisadi və siyasi balans üçün yeni mərhələ başlaya bilər. İranın maliyyə resurslarına çıxışının məhdudlaşdırılması isə Yaxın Şərqdə onsuz da gərgin olan münasibətlərə əlavə təsir göstərə bilər.
Sədaqət Həsənova
