Türkiyənin Milliyyətçi Hərəkat Partiyasının (MHP) sədri Dövlət Bağçalı Azərbaycanın 18 Oktyabr – Müstəqilliyin Bərpası Günü münasibətilə təbrik mesajı yayıb.
Gündəm24.az xəbər verir ki, Bağçalı Azərbaycanın müstəqilliyinin bərpasının 35-ci ildönümü münasibətilə iki ölkə arasındakı tarixi və mədəni bağlara diqqət çəkib.
O, 1991-ci il oktyabrın 18-də qəbul edilən “Azərbaycan Respublikasının Dövlət Müstəqilliyi haqqında Konstitusiya Aktı”nı xatırladaraq, bu tarixi günün Azərbaycan xalqının suverenlik və azadlıq iradəsini nümayiş etdirdiyini bildirib.
MHP sədri 2020-ci il sentyabrın 27-dən noyabrın 10-dək davam edən İkinci Qarabağ müharibəsi və Azərbaycanın əldə etdiyi Zəfərin ölkənin müstəqilliyinə yeni məna və güc qazandırdığını vurğulayıb.
Bağçalı Türkiyə ilə Azərbaycanın ortaq tarixə, mədəniyyətə və tale birliyinə malik olduğunu qeyd edərək, iki ölkənin “Bir millət, iki dövlət” anlayışı ilə hərəkət etdiyini bildirib.
“Biz eyni ananın iki oğluyuq. Əzəldən əbədə dinimiz, dilimiz, sevgimiz, yolumuz birdir. Sevgimiz də, mübarizəmiz də birdir”, – deyə o vurğulayıb.
