“Vergi qanunvericiliyinə əsasən, dövriyyəsi 200 min manata qədər olan şəxslər sadələşdirilmiş vergi ödəyicisi olmaq hüququna malikdirlər. Belə vergi ödəyiciləri sadələşdirilmiş sistem üzrə yalnız 2% dərəcəsi ilə vergi ödəyirlər”.
Gündəm24.az Demokrat.az-a istinadən xəbər verir ki, bunu vergi məsələləri üzrə ekspert Anar Bayramov deyib.
“Əgər dövriyyə 200 min manatı keçərsə, həmin şəxslər artıq sadələşdirilmiş vergi ödəyicisi hüququnu itirir və avtomatik olaraq həm ədədi ödəyici, həm də gəlir vergisi ödəyicisi kimi qeydiyyata alınırlar. Ədədi ödəyicilər 18%, gəlir vergisi ödəyiciləri isə xərclər çıxıldıqdan sonra 20% dərəcəsi ilə vergi ödəyirlər. Bu səbəbdən, xüsusilə pərakəndə ticarətlə və əhali xidmətləri ilə məşğul olan şəxslər çalışırlar ki, sadələşdirilmiş vergi ödəyicisi statusunu qoruyub saxlasınlar”.
Ekspert bildirib ki, 200 min manatlıq dövriyyə limiti uzun müddətdir ki, qanunvericilikdədir:
“Qiymətlərin artması və inflyasiya nəzərə alındıqda, bu limit artıq çox aşağı hesab olunur. Buna görə də ictimaiyyət arasında tez-tez 200 min manatlıq limiti artırmaq təklif olunur”.
Onun sözlərinə görə, 2026-cı ildən etibarən vergi məcəlləsinə ediləcək dəyişikliklərlə bu məsələ bir qədər tənzimlənəcək:
“Yeni qaydaya görə, əgər vergi ödəyicisinin dövriyyəsi 400 min manat olsa və bu dövriyyənin hamısı postterminal vasitəsilə aparılsa, dövriyyənin yarısı, yəni 0,5 əmsalı nəzərə alınacaq. Belə olduqda, dövriyyə 200 min manat kimi hesablanacaq və vergi ödəyici sadələşdirilmiş sistemdə qala biləcək”.
