Ötən həftələrdə Qida Təhlükəsizliyi Agentliyinin əməkdaşları tərəfindən Sabunçu bazarında və bazarətrafı qida obyektlərində reyd keçirilib.
Baxış zamanı bazarda açıq şəraitdə, soyuducudan kənar, temperatur rejiminə əməl olunmadan və baytarlıq ekspertizasından keçirilməmiş süd və süd məhsullarının, eləcə də ev üsulu ilə hazırlanmış və etiket məlumatları qeyd edilməyən müxtəlif növ turşuların satışa çıxarıldığı məlum olub.
Ümumiyyətlə, bu kimi süd məhsullarının, əsasən də turşuların istifadəsi nə qədər zərərlidir?
Gündəm24.az Redaktor.az-a istinadla xəbər verir ki, qida eksperti İlkin Şirinov bildirdi ki, əgər biz süd-qatıq məhsullarından danışırıqsa, seçilmiş temperatur 5 dərəcə Selsidən yuxarı çıxdıqda bakteriyaların sürətlə çoxalması prosesi başlayır:
“Yəni bu cür məhsullar artıq məhsula yox, zəhərə çevrilməyə başlayır. Bu zaman listeriya yaranır. Listeriya elə bir bakteriyadır ki, sərin mühitdə belə yaşayır və ən təhlükəli, sərin mühitdə belə çoxalan bakteriyalardan biridir, ölümlə nəticələnə bilir. Salmonella bakteriyası da var. Bu, qızdırma ilə müşahidə olunur. E. coli bağırsaqda qanaxmaya qədər gətirib çıxardan mikroblardan biridir. Botulizm isə həftələrlə insanı yatağa salan, ölümə qədər gətirib çıxara bilən bakteriyadır”.
Ekspert bazarlarda satılan turşulardan da danışdı:
“Turşu ev şəraitində hazırlanıb bazara çıxarıldığı andan təhlükəyə çevrilən bir məhsuldur. Çünki burada heç bir etiketlənmə qaydası yoxdur. Burada hər hansı saxlama rejiminə əməl olunmur, soyuq qida zəncirinə əməl olunmur, gigiyenik vəziyyət bərbaddır. Əlcəksiz bu məhsullara toxunmaq da böyük yanlışdır. Hətta qeyd olunur ki, “evdə hazırlanıb”. Hansı şəraitdə, hansı turşu ilə hazırlandığı bilinmir. Bəzən də turşunun ömrünü uzatmaq üçün texniki sirkələrdən istifadə olunur. Mütəxəssis rəyi olmadan satılan bu məhsullar ölümlə nəticələnə bilər. Bu gün üzərində istehsalı və saxlanma qaydası olmayan, gözə gözəl gələn məhsullara rəngləndiricilər vurulur”.
Onun sözlərinə görə, hər bir bazarın baytarlıq, nəzarət və ekspertiza laboratoriyası olmalıdır:
“Hər bir bazarın nəzarət edən baytar həkimi olmalıdır. Amma bu baytarlıq nəzarəti kağız üzərində deyil, formal olmamalıdır. Yəni baytarlıq nəzarəti funksional olaraq çalışmalıdır. Bu gün hər hansı bir məhsula arayış vermək, möhür vurmaq həmin bazarda baytarlıq fəaliyyətinin çalışması demək deyil. Bazarlarda olan baytarlıq laboratoriyaları çalışmır. Həmçinin həkim nəzarətinin bazarlarda olub-olmaması belə bilinmir. Təbii ki, bu vaxt heyvan mənşəli məhsullarda problemlər olacaq”.
