Ermənistan Avropa İttifaqı ilə yaxınlaşdığı bir dövrdə yeni və həssas problemlə üz-üzə qala bilər.
Gündəm24.az xəbər verir ki, bu barədə Macarıstanın TEC nəşri Nikol Paşinyana yaxın mənbələrə istinadən yazıb. Nəşrin yazdığına görə, ölkə yaxın illərdə böyük miqrant axınını qəbul etməyə məcbur ola bilər. Bu isə cəmiyyətdə birmənalı qarşılanmayacaq. Əhalisi üç milyondan az olan Ermənistanın etnik tərkibi 97–98 faiz monoetnikdir və siyasi sistem böyük ölçüdə milli kimliyin qorunması üzərində qurulub. Lakin indi ilk dəfə olaraq baş nazir Nikol Paşinyan-ın ətrafına daxil olan şəxslər bu modeldən imtina ehtimalını açıq şəkildə dilə gətirirlər.
Hakim “Vətəndaş Müqaviləsi” partiyasının deputatı Arsen Torosyan parlamentdə çıxışı zamanı bildirib:“Biz immiqrasiyanı təşkil etməliyik, hətta bu, milli ideyalarla üst-üstə düşməsə belə. On minlərlə insan ölkəyə köçməlidir. Biz həmçinin monoetnik düşüncə tərzini dəyişməliyik. Çünki bu regionda sağ qalmağın başqa yolu yoxdur”.
Bu çıxış son günlər sosial şəbəkələrdə geniş yayılıb və ciddi daxili müzakirələrə səbəb olub.Bu bəyanat Ermənistan–Avropa İttifaqı sammitindən qısa müddət sonra səsləndirilib. 4–5 may tarixlərində İrəvanda keçirilən görüşdə tərəflər iqtisadi, siyasi və institusional əməkdaşlığın dərinləşdirilməsi barədə razılığa gəliblər. Aİ Ermənistan üçün yeni investisiyalar və maliyyə dəstəyi vəd edib.
Bəzi müşahidəçilər hesab edir ki, bu yaxınlaşma Ermənistanı Avropa modelinə uyğun miqrasiya siyasətinə doğru yönəldə bilər. Rəsmi şəkildə belə bir tələb irəli sürülməsə də, bu mövzu ətrafında müzakirələr getdikcə güclənir. Məsələ həm də demoqrafik problemlərlə bağlıdır. Ermənistan uzun illərdir əhali azalması ilə üzləşir. Doğum səviyyəsi 1,7–1,9 civarındadır ki, bu da əhalinin təbii artımı üçün kifayət etmir. BMT proqnozlarına görə, bu tendensiya davam edərsə, ölkə əhalisi gələcəkdə daha da azalacaq.
Bu şəraitdə hər il 20–50 min miqrantın qəbul edilməsi əhalinin sayını sabitləşdirmək və əmək bazarını canlandırmaq üçün mümkün variant kimi qiymətləndirilir. Lakin bu addım ciddi siyasi və mədəni çətinliklər yaradır. Ermənistan monoetnik quruluşa malik nadir ölkələrdən biridir və burada milli kimlik, din və tarix bir-biri ilə sıx bağlıdır. Bu səbəbdən miqrasiya məsələsi cəmiyyətdə həssas mövzu kimi qəbul olunur.
Bundan əlavə, Ermənistan son illərdə mühüm geosiyasi dəyişikliklər yaşayır. Baş nazir Nikol Paşinyan Qərbə inteqrasiya kursunu gücləndirir. Bu siyasət ABŞ tərəfindən də dəstəklənir və Donald Trump Ermənistan rəhbərliyinə müsbət münasibət bildirib. Eyni zamanda, Rusiya Ermənistanın bu istiqamətdə addımlarını narahatlıqla izləyir və enerji və iqtisadi əməkdaşlığı yenidən nəzərdən keçirə biləcəyini bildirir.
Beləliklə, Ermənistan qarşısında çətin seçim dayanır. Bir tərəfdə demoqrafik problemlərin həlli üçün miqrasiyaya açıq olmaq, digər tərəfdə isə milli kimliyi və mövcud sosial modeli qorumaq zərurəti var.\\musavat.com
