Dovşan ətinin haram və ya halal olması ilə bağlı zaman-zaman məsələlər gündəmə gəlir.
Bəs dovşan ətini yemək olarmı?
Qida eksperti İlkin Şirinov Redaktor.az-a açıqlamasında bildirdi ki, dovşan ətinin haram olması ilə bağlı dində qəti bir hökm yoxdur:
“Əgər bir məhsul və ya qida haqqında qəti hökm yoxdursa, bununla bağlı cəmiyyətdə hər hansı panika yaratmaq düzgün deyil. Ümumiyyətlə, dovşan ətinin haram olması ilə bağlı belə bir hökmə rast gəlinməyib.
Mən uşaqlığımdan dovşan saxlamışam, hazırda da saxlayıram. Dovşan əti yüksək proteinlidir, az yağlıdır və tez həzm olunur. Müqəddəs kitabımız olan Qurani-Kərimdə dovşan ətinin haram olması ilə bağlı heç bir ayəyə və ya ifadəyə rast gəlinmir”.
Müsahibimiz vurğuladı ki, qida təhlükəsizliyi baxımından, əgər baytarlıq nəzarəti mövcuddursa, ətin saxlanması ilə bağlı soyuq qida zənciri pozulmayıbsa və ətin hər hansı problemi yoxdursa, burada dovşan ətinin ziyanından söhbət gedə bilməz.
“Əksinə, dovşan əti dietik məhsul sayılır. Dovşan ətində hər hansı ağırlıq yoxdur, tez həzm olunur. Bu kimi məsələlərlə bağlı hər hansı problemin olmasına mən indiyədək rast gəlməmişəm. Mən özüm şəxsən uşaqlığımdan bu təsərrüfatla məşğul olmuşam, ətindən istifadə etmişik və bununla bağlı heç bir problem yaşamamışıq”, – deyə İ.Şirinov qeyd etdi.
