Türkiyənin ilk pilotsuz döyüş təyyarəsi “Bayraktar KIZILELMA” sınaq təlimlərində görmə məsafəsindən uzaqda hərəkət edən hədəfi “hava–hava” tipli raketlə vuraraq dünya aviasiya tarixində ilkə imza atdı. Bu hadisə dünya mediasında ciddi maraq doğurdu. Hətta bu hadisədən sonra Yunanıstanın müdafiə naziri Türkiyənin Yunanıstan üçün təhdid yaratdığını iddia edərək Egey dənizindəki yüzlərlə adaya raket yerləşdirəcəyini açıqladı.
KIZILELMA Türkiyənin müdafiə sənayesinə hansı töhfəni verəcək?
Gündəm24.az Avrasiya Strateji Araşdırmalar Mərkəzinin (ASAM) başqanı Dr. Eray Güçlüer Globalinfo.az-a istinadən bildirib ki, KIZILELMA, havada hərəkət edən hədəfi ASELSAN tərəfindən yerli istehsal olan radar idarəetməsi və TÜBİTAK tərəfindən yerli istehsal olan GÖKDOĞAN raketi ilə vuran ilk pilotsuz uçuş aparatıdır:
“ABŞ, Rusiya və Çin kimi ölkələr beşinci nəsil PUA texnologiyalarına sahib olsa da, o, radar deyil, termal idarəetməyə malikdir. Görmə məsafəsindən kənara çıxa bilən GÖKDOĞAN raketi radarla idarə olunur. Yəni, radar şüaları hansısa obyektə dəyib geri qayıtmır. Bu, bizə F-35 kimi bir hədəfi uzaq məsafədən vurmaq imkanı verir. Buna termal idarəetmə ilə nail olmaq çətindir. GÖKDOĞAN raketinin son versiyasının mənzili təxminən 200 km-dir. Buna görə KIZILELMA-nı “pilotsuz uçuş aparatı” deyil, “pilotsuz döyüş təyyarəsi” adlandırmaq daha doğru olardı”.
Dr. Eray Güçlüer
Dr. Güçlüer qeyd edib ki, MURAD 100 AESA radarı təxminən 150 km məsafədən F-16, F-15 kimi bütün 4-cü nəsil təyyarələri, eləcə də F-35-ləri görmək imkanı verir:
“Tutaq ki, KIZILELMA F-35-ə raket atır, lakin eyni zamanda özü hədəfə çevrilib. O zaman hədəfdə olmayan digər KIZILELMA hədəfə alınan KIZILELMA-dan radar idarəçiliyini ələ keçirə bilir. KIZILELMA-lardan biri vurulsa belə, digərinin öz missiyasını davam etdirməsi və pilotlu bir F-35-i pilotsuz 2-3 KIZILELMA ilə zərərsizləşdirmək inanılmaz bir qabiliyyətdir. Dünyanı heyrətə gətirən də budur”.
Azərbaycanın bu yeni döyüş təyyarələrini alması ehtimalı ilə bağlı suala cavabında Dr. Güçlüer bunun mümkün olduğunu və Azərbaycanda birgə fabrik yaradıla biləcəyini söyləyib.
