Ayaq yollarından xüsusi maşınlar vasitəsilə çəkilən tullantıların Saatlı rayonu ərazisində balıq saxlanılan göllərə, hovuzlara boşaldılması ilə bağlı yayılan məlumatlar son günlər geniş müzakirə edilməkdədir.
Bəs balıqların bu tullantılarla qidalanması nə qədər təhlükəlidir?
Redaktor.az-a açıqlama verən qida eksperti İlkin Şirinov bildirdi ki, hal-hazırda Lökbatan gölünün və Sumqayıt gölünün ətrafında yaşayış evləri var, amma kanalizasiya sistemi yoxdur:
“Evlərdən çıxan kanalizasiyaların birbaşa göllərə axıdılması və həmin göllərdən balıq tutulub istifadə edilməsi təbii ki, qəbul edilməz bir prosesdir. Bu tullantıların tərkibində ağır metallar və müxtəlif kimyəvi vasitələr mövcuddur. Bu balıqlardan istifadə insanın müxtəlif orqanlarına zərər verə, hətta hepatitə yoluxdura bilər. Amma burada ictimai məsələlər də var”.
Onun fikrincə, insanların da ekoloji vəziyyətə nəzarət mexanizmi olmalıdır:
“Ekologiya və Təbii Sərvətlər Nazirliyi, Azərbaycan Qida Təhlükəsizliyi Agentliyi və aidiyyəti qurumlar mütləq yalnız qapalı məkanlarda yoxlamalar aparmalı və cərimə yazmalıdır? Göllərə də nəzarət olunmalıdır.
Mənim bildiyimə görə, Ekologiya və Təbii Sərvətlər Nazirliyinin tərkibində xüsusi balıq yetişdirmə məntəqələrinə və meşə təsərrüfatlarına nəzarət mexanizmi var. Onlar balıq təsərrüfatlarının suyundan analiz götürmək imkanına malikdir. Xüsusi laboratoriyada suyu yoxlamaq səlahiyyəti və imkanları var. Ən azından monitorinqlər aparılmalıdır ki, vəziyyət mütəmadi nəzarətdə saxlanıla bilsin”.
