Milli Məclisin sabiq deputatı, iş adamı Mahir Aslanovun ölümünün təfərrüatları məlum olub.
Gündəm24.az bildirir ki, “Yeni Sabah”ın əldə etdiyi xəbərə görə, uzun müddətdir Rusiyasının Yessentuki şəhərində yaşayan sabiq parlament üzvünün bir ay əvvəl ürəyində ciddi problemlər yaranıb.
O, bununla əlaqədar olaraq Bakıya qayıdıb.
Burada sahibi olduğu “Kəpəz” xəstəxanasında müayinələrdən keçib. Keçirilən müayinələr zamanı Mahir Aslanovun təcili əməliyyata ehtiyacı olduğu müəyyənləşib.
Həkimlər ona Türkiyənin İzmir şəhərində əməliyyat olunmağı məsləhət görüblər. M.Aslanov bununla əlaqədar olaraq adıçəkilən şəhərə gedib və əməliyyat olunub, lakin əməliyyat uğursuz alınıb və keçmiş deputat narkozdan ayılmayıb.
Mərhumun cənazəsinin bu gün Azərbaycana gətiriləcəyi gözlənilir. O, Bakı şəhərində dəfn olunacaq.
Qeyd edək ki, M.Aslanov 1949-cu il noyabrın 22-də Naftalan şəhərində doğulub. 2010-2020-ci illərdə iki çağırış Milli Məclisin deputatı olub.
09:17
Azərbaycan Respublikası Milli Məclisinin sabiq deputatı Mahir Aslanov vəfat edib.
Gündəm24.az Editor.az-a istinadən xəbər verir ki, sabiq deputat Türkiyənin İzmir şəhərində yerləşən xəstəxanada ağır ürək əməliyyatına daxil olub. Lakin əməliyyat zamanı onun həyatını xilas etmək mümkün olmayıb.
Qeyd edək ki, Mahir Aslanov 1949-cu il noyabrın 22-də Naftalan şəhərində anadan olub.
Mahir Aslanov Azərbaycan Politexnik İnstitutunun Mexanika fakültəsini bitirib. Əmək fəaliyyətinə 1971-ci ildə Xabarovsk vilayətinin Teploozyorski sement zavodunda mexanik kimi başlayıb.
1973-1978-ci illərdə “Aztransqaz” İstehsalat Birliyində mühəndis, böyük mühəndis və avtomobil təsərrüfatının müdiri vəzifələrində çalışıb. 1978-1992-ci illərdə Azərbaycan Avtomobil Nəqliyyatı Nazirliyində təhlükəsizlik texnikası üzrə mühəndis, böyük mühəndis, şəhərlərarası sərnişindaşıma avtobus parkında baş mühəndis, avtokombinatda aparıcı mühəndis, baş mühəndisin müavini və baş mühəndis olub.
1992-ci ildən “Azəravtonəqliyyat” Dövlət Konsernində aparıcı mühəndis kimi fəaliyyət göstərib. 1993-cü ildən “Azazmoimport”, 1995-ci ildən isə “Kəpəz” firmasının direktoru vəzifəsində çalışıb.
Mahir Aslanov Milli Məclisin Aqrar siyasət komitəsinin üzvü olub. O, Azərbaycan-Əfqanıstan parlamentlərarası əlaqələr üzrə işçi qrupunun rəhbəri, həmçinin Belçika, Bolqarıstan, Finlandiya, Gürcüstan və Özbəkistan parlamentləri ilə əlaqələr üzrə işçi qruplarının üzvü kimi fəaliyyət göstərib.
Mahir Aslanov 2010-2020-ci illərdə iki çağırış Milli Məclisin deputatı olub.
Mahir Aslanov ailəli idi, 3 övladı var.
