Azərbaycan Prezidenti İlham Əliyevin Şuşa Qlobal Media Forumundakı proqram xarakterli çıxışı ölkənin milli təhlükəsizlik arxitekturasının və xarici siyasət strategiyasının əsas konturlarını növbəti dəfə dəqiqləşdirib. Dövlət başçısının daxili sabitliyə hər hansı bir riskin olmadığını bəyan etməsi fonunda bütün təhdidlərin məhz sərhədlərdən kənarda formalaşdığına diqqət çəkməsi Bakının qlobal güc mərkəzləri ilə münasibətlərindəki ayıq-sayıqlığını nümayiş etdirir. Müasir hərbi doktrinaların və proqnozlaşdırılması mümkün olmayan regional müharibələrin ortasında yerləşən Azərbaycan üçün ən böyük təhlükə məhz xarici avantüralara cəlb olunmaq cəhdləri və sanksiya təzyiqləridir. Ölkə rəhbərliyinin 2003-cü ildən bəri müdafiə sistemlərinin gücləndirilməsini prioritet vəzifə hesab etməsi və “sakit həyat olmayacaq” xəbərdarlığı Bakının həm siyasi, həm də diplomatik müstəvidə çoxvektorlu hücumlara qarşı hər an hazır olduğunu göstərir.
Məsələ ilə bağlı siyasi şərhçi Azər Hüseynov qeyd edib ki, Azərbaycanın iki aktiv müharibə ocağının ortasında yerləşməsi onun xarici siyasətində neytrallığı və güclü müdafiə balansını qorumağı tarixi zərurətə çevirir: “Prezident İlham Əliyevin də vurğuladığı kimi, ölkəmiz üçün ən böyük risk Bakını müxtəlif regional münaqişələrin tərəfinə çevirmək və öz geosiyasi maraqları naminə hansısa avantüralara sürükləmək istəyən xarici dairələrin fəallığıdır. Azərbaycan indiyə qədər müstəqil xarici siyasət yürütməklə və heç bir hərbi-siyasi bloka qoşulmamaqla özünü bu təhlükələrdən qoruya bilib. Lakin həm Ukrayna xəttində, həm də Yaxın Şərqdə davam edən və nəticələri proqnozlaşdırıla bilməyən müharibələr regional təhlükəsizlik mühitini tamamilə sarsıdır. Belə bir vəziyyətdə daxili sabitliyin qorunub saxlanması bizim ən böyük qalxanımızdır və kənardan gələn ideoloji və ya siyasi təxribatların xalq-iqtidar birliyi qarşısında iflasa uğraması Bakının strateji manevr imkanlarını qoruyub saxlayır”.
Onun sözlərinə görə, 2023-cü ildən sonra Azərbaycana qarşı baş qaldıran açıq təzyiqlər və sanksiya təhdidləri ölkənin öz ərazi bütövlüyünü tam bərpa etməsindən sonra yaranan yeni geosiyasi reallıqların birbaşa nəticəsidir: “Qərbdəki müəyyən güc mərkəzləri Azərbaycanın Qarabağda əldə etdiyi tarixi qələbəni və müstəqil siyasətini sinirə bilmirlər, buna görə də müxtəlif beynəlxalq platformalarda ölkəmizə qarşı diplomatik cəbhə açmağa çalışırlar. Dövlət başçısının ‘sakit həyat olmayacaq’ mesajı həm cəmiyyətə, həm də dövlət aparatına yönəlmiş ciddi bir çağırışdır ki, hərbi sahədə əldə olunan uğurlar bizi arxayınlaşdırmamalıdır. Biz fiziki təhlükələrlə bərabər, həm də beynəlxalq hüquq müstəvisində unikal bir müdafiə diplomatiyası yürütmək və eyni vaxtda fərqli cəbhələrdən gələn basqılara sinə gərmək məcburiyyətindəyik. Müasir müdafiə sistemlərinin davamlı yenilənməsi və milli təhlükəsizlik tədbirlərinin gücləndirilməsi Azərbaycanın bu amansız geosiyasi rəqabətdə öz suverenliyini qoruyub saxlamasının yeganə təminatıdır”.//nocomment.az
