Misir Xarici İşlər Nazirliyi bildirib ki, ABŞ və İran arasında cümə axşamı günü keçiriləcək Cenevrə danışıqlarından əvvəl gərginliyi azaltmaq məqsədilə Omanın xarici işlər naziri əl-Busaidi, İranın xarici işlər naziri Arakçi, MAQATE-nin baş direktoru Qrossi və ABŞ-ın Yaxın Şərq üzrə xüsusi elçisi Stiv Vitkoffla görüşlər keçirilib.
Gündəm24.az xəbər verir ki, Reuters agentliyinin məlumatına görə, Misir Xarici İşlər Nazirliyi bildirib ki, prezidentin göstərişinə uyğun olaraq, xarici işlər naziri Bədr Əbdüllatti son iki gün ərzində Omanlı həmkarı Bədr bin Həməd əl-Busaidi və İranın xarici işlər naziri Abbas Əraqçi ilə görüşlər keçirib. Nazir həmçinin Beynəlxalq Atom Enerjisi Agentliyinin baş direktoru Rafael Mariano Qrossi və ABŞ-ın Yaxın Şərq üzrə xüsusi nümayəndəsi Stiv Vitkoff ilə danışıqlar aparıb. Görüşlərin məqsədi regionda gərginliyin azaldılması və İranın nüvə proqramı ilə bağlı konsensusa əsaslanan həll yoluna çatmaq olub.
Danışıqlar zamanı regionda artan gərginliyin qarşısının alınması və ABŞ ilə İran arasında danışıqların davam etdirilməsi üçün uyğun mühitin yaradılmasının vacibliyi vurğulanıb. Misir naziri Əbdüllatti bildirib ki, fikir ayrılıqlarının aradan qaldırılması və regional təhlükəsizliyin qorunması zəruridir, böhranların yalnız diplomatik və siyasi vasitələrlə həll edilə biləcəyi qeyd olunub.
Omanın xarici işlər naziri Bədr bin Həməd əl-Busaidi isə sosial media hesabında ABŞ-İran danışıqlarının cümə axşamı Cenevrədə keçiriləcəyini və razılaşmanın yekunlaşdırılması istiqamətində müsbət irəliləyiş əldə ediləcəyini təsdiqləyib.
Sədaqət Həsənova
