Fransa prezidenti Emmanuel Makron bildirib ki, Avropa İttifaqını parçalamağa yönəlmiş anti-Avropa ideologiyası ABŞ-da güclənir. İspaniya mediasına danışan Makron Vaşinqtonun strateji sənədlərinin Aİ-yə hörmətsizlik olduğunu iddia edib. Bu sözlər JD Vensin Münhendəki çıxışından sonra gərginliyi artırıb.
Gündəm24.az xəbər verir ki, Fransa prezidenti Emmanuel Makron “El País” və “Tagesanzeiger” qəzetlərinə verdiyi müsahibələrdə xəbərdarlıq edib ki, ABŞ-da Avropa İttifaqını hədəf alan anti-Avropa ideologiyası geniş yayılıb və bu, Avropanın gələcəyi üçün ciddi təhlükə yaradır. Makron bu yanaşmanı “tarixi bir yenilik” adlandıraraq, Vaşinqtonun hazırkı siyasi xəttinin Aİ-ni zəiflətmək və parçalamaq məqsədi daşıdığını bildirib.
O qeyd edib ki, ABŞ-ın son müdafiə və xarici siyasət sənədləri Avropaya qarşı uzaq və təcridedici mövqeni əks etdirir ki, bu da transatlantik münasibətləri zəiflədir və Avropanın qlobal siyasətdəki rolunu təhlükə altına qoyur. Makron vurğulayıb ki, əgər Avropa lazımi addımları atmasa, beş il ərzində ciddi şəkildə zəifləyə və hətta “yoxa çıxa” bilər.
Fransa liderinin bu açıqlamaları ABŞ vitse-prezidenti JD Vensin 2025-ci ilin fevralında Münhen Təhlükəsizlik Konfransında Avropanı sərt tənqid etməsindən sonra səslənib. Vens Rumıniyada seçki nəticələrinin ləğvini misal gətirərək Avropada demokratik standartların zəiflədiyini iddia etmişdi ki, bu da Avropa paytaxtlarında kəskin reaksiyalara səbəb olub.
Sədaqət Həsənova
