ABŞ ilə İran arasında regional gərginliyin azaldılması məqsədilə aparılan müzakirələrin həlledici mərhələyə qədəm qoyduğu bir vaxtda, Ağ Ev rəhbərliyindən Tehrana qarşı kəskin hərbi təhdid mesajı gəlib. ABŞ Prezidenti Donald Tramp Vaşinqtonun şərtləri qəbul edilməyəcəyi təqdirdə İrana qarşı hərbi güc tətbiqinin yenidən masaya qayıda biləcəyini bəyan edib.
Gündəm24.az NOCOMMENT.az-a istinadən xəbər verir ki, mətbuata açıqlama verən ABŞ lideri rəsmi Vaşinqtonun Tehranın hazırkı danışıqlar mövqeyindən hələ rəsmən razı olmadığını və prosesin gedişatını yaxından izlədiklərini vurğulayıb. Donald Tramp hadisələrin inkişafından asılı olaraq hərbi ssenarilərin tamamilə istisna edilmədiyini bildirərək, “Görəcəyik nə olacaq. Geri qayıdıb buna son qoymalı ola bilərik, ya da qoymayacağıq”, — deyə kəskin xəbərdarlıq edib.
ABŞ Prezidenti öz bəyanatında İranın daxili və xarici təzyiqlər qarşısında ciddi şəkildə küncə sıxışdığını iddia edərək rəsmi Tehranın hazırda bütün gücü ilə danışıqlar aparmağa çalışdığını diqqətə çatdırıb. Tramp İran hökumətinin qarşısında ABŞ-ın şərtlərini qəbul etməkdən başqa çıxış yolunun qalmadığını qeyd edərək, “Düşünürəm ki, onlar sadəcə razılaşmaq istəyirlər. Düşünmürəm ki, başqa seçimləri var”, — deyə əlavə edib.
Müşahidəçilər Trampın bu sərt çıxışını İsrailin Milli Təhlükəsizlik naziri İtamar Ben-Qvirin ABŞ-İran sazişinə qarşı üsyan xarakterli bəyanatlarından sonraya təsadüf etdiyini vurğulayırlar. Ekspertlərin fikrincə, Ağ Ev bu bəyanatla həm müttəfiqi İsrailin narahatlıqlarını yatırtmağa, həm də danışıqlar masasında Tehrandan maksimum güzəştlər qoparmaq üçün hərbi ritorikadan təzyiq vasitəsi kimi istifadə etməyə çalışır.
