Müəllimlərin sosial rifahının yaxşılaşdırılması və onlara müxtəlif xidmətlərdən güzəştli şərtlərlə yararlanmaq imkanı yaradılması məqsədilə “TəhsilPlus” layihəsi həyata keçirilir.
Bəs, “TəhsilPlus” güzəştli kartı indiyədək neçə müəllimə təqdim olunub? Kartların paylanması hansı meyarlar əsasında həyata keçirilir? Bu proses regionlar üzrə mərhələli şəkildə aparılır, yoxsa bütün ölkəni əhatə edir? Hazırda kartların paylanması hansı mərhələdədir?
Təhsilin İnkişafı Fondundan Redaktor.az-ın sorğusuna cavab olaraq bildirildi ki, “TəhsilPlus” kartı mərhələli şəkildə ölkə üzrə bütün təhsil işçilərini əhatə edəcək:
“Kartların paylanmasına ilkin olaraq Bakı və Gəncə şəhərlərində başlanılıb və hazırda proses davam edir. “TəhsilPlus” kartı təhsil işçilərinin əməkhaqqı kartı funksiyasını daşıdığı üçün kart sifarişləri təhsil müəssisələri tərəfindən formalaşdırılır. Kartlar bank tərəfindən hazırlanaraq müvafiq təhsil müəssisələrinə təhvil verilir və müəllimlərə təqdim olunur. Hazırda paylanma prosesi ümumi və ali təhsil müəssisələrini əhatə edir. Bu mərhələ başa çatdıqdan sonra məktəbəqədər, peşə və orta ixtisas təhsili müəssisələrinin əməkdaşları da layihəyə cəlb olunacaqlar. “TəhsilPlus” kartı əməkhaqqı kartı olmaqla yanaşı, müxtəlif sahələrdə güzəşt və üstünlüklər də təqdim edir. Kart istifadəçiləri ictimai nəqliyyat, tibb, aptek, market, yanacaq, iaşə, kitab və digər tərəfdaş müəssisələrdə xüsusi endirim və bonus imkanlarından yararlana bilirlər. Eyni zamanda, tərəfdaş şəbəkəsi və kartın təqdim etdiyi üstünlüklər davamlı olaraq genişləndirilir. Məqsədimiz yaxın müddətdə ölkə üzrə fəaliyyət göstərən bütün təhsil işçilərini “TəhsilPlus” kartı ilə əhatə etməkdir”.
