Ukrayna Prezidenti Volodimir Zelenski Kiyevin ABŞ vasitəsilə Pasxa bayramı dövründə mümkün atəşkəs təşəbbüsü irəli sürdüyünü bildirib. Lakin onun sözlərinə görə, bu təklifin Rusiya tərəfinə çatdırılıb-çatdırılmadığı hələlik dəqiq deyil.
Gündəm24.az xəbər verir ki, Ukrayna Rusiyanın mövzu ilə bağlı açıqlamalarını diqqətlə izləyir və Moskvanın bu addıma maraq göstərmədiyi iddia olunur. Bununla belə, o, Rusiya tərəfinin cavabının nə dərəcədə ciddi olduğunu qiymətləndirməyin çətin olduğunu vurğulayıb.
Prezident bildirib ki, Pasxa atəşkəsi ilə bağlı təklif hələ də qüvvədə qalır. Eyni zamanda o, Ukraynanın ABŞ-dan olan nümayəndə heyətini danışıqlara dəvət etdiyini açıqlayıb.
Zelenski əlavə edib ki, Kiyev mövcud vəziyyətdə üçtərəfli görüşün təşkilinə alternativ kimi ayrı-ayrı görüş formatını da təklif edir. Onun sözlərinə görə, tərəflər arasında birbaşa və ya mərhələli danışıqların aparılması da mümkün variant kimi nəzərdən keçirilir.
Ukrayna lideri həmçinin silah təchizatı məsələsinə toxunaraq, hələlik PURL proqramı çərçivəsində hər hansı məhdudiyyətlə bağlı siqnal almadıqlarını bildirib. O, PAC-3 raketlərinin əldə olunması istiqamətində danışıqların davam etdiyini, lakin bunun üçün ABŞ-ın razılığının vacib olduğunu qeyd edib./Ajans.az
