Hesabata görə, ABŞ hakimiyyəti əsasən Zambiya, Qvineya və Konqo Demokratik Respublikasında mineral hasilatına diqqət yetirir.
Gündəm24.az xəbər verir ki, Reuters agentliyinin ekspertlərə istinadən verdiyi məlumata görə, ABŞ Çinlə sənayedə rəqabət aparmaq üçün Konqo Demokratik Respublikası və digər Afrika ölkələrindəki şirkətlərlə mis və kobalt tədarükü üzrə əvvəlcədən müqavilələr bağlayır. “Control Risks” şirkətinin analitiki Vinsent Ruce bildirir ki, bu, ABŞ-ın sənayəyə birbaşa müdaxilə etmədən maliyyə gücünü tətbiq etməsidir və Konqonun misini Amerika alıcılarına yönləndirir, lakin mədənlərin idarə olunması ilə bağlı riskləri öz üzərinə götürmür.
ABŞ hakimiyyəti əsasən Zambiya, Qvineya və Konqo Demokratik Respublikasında mineral hasilatına diqqət yetirir. Pekindən fərqli olaraq, Vaşinqton işçilərini Afrikaya göndərmir və birbaşa mədən əməliyyatları aparmır, bunun əvəzinə yerli şirkətlərlə müqavilələrə güvənir. Agentlik KoBold Metals şirkətini nümunə göstərir: bu Amerika şirkəti Konqo Demokratik Respublikasında 3000 kvadrat kilometrdən çox mis və litium yataqları əldə edib, lakin bürokratiya səbəbindən orada mədənçilik etmir.
Çin şirkətləri isə Konqodakı ən böyük mis və kobalt yataqlarının bir çoxuna nəzarət edir və bazara sürətli çıxışı ilə ABŞ-ı qabaqlayır. Çin təşkilatları birbaşa yataqlarda fəaliyyət göstərir və dünyanın aparıcı təchizatçısı olaraq mövqeyini qoruyur, bu isə ABŞ-ın Afrika bazarına girişini çətinləşdirir.
Sədaqət Həsənova
