Kubanın xarici işlər naziri Bruno Rodrigez ABŞ-ın Venesuelaya hərbi müdaxiləsindən sonra ölkəsini hədəf alan açıqlamalara reaksiya verərək, “Kuba satılmır” dedi.
Gündəm24.az xəbər verir ki, Kubanın xarici işlər naziri Bruno Rodrigez ABŞ-ın Venesuelaya hərbi müdaxiləsindən sonra Kubaya qarşı yönəlmiş açıqlamalara münasibət bildirib. Rodrigez vurğulayıb ki, Kuba satılmaq üçün deyil və suverenliyini qorumağa davam edəcək. Sosial media paylaşımında o qeyd edib: “Biz kubalılar ölkəmizi satmağa, təhdid və şantaj qarşısında geri çəkilməyə və ya dünya ilə sülh içində öz taleyimizi qurmaq kimi ayrılmaz hüququmuzdan imtina etməyə hazır deyilik.”
Rodrigez ABŞ-ın Kubaya qarşı təhdidlərinə də toxunaraq bildirib ki, Kuba müdafiə olunacaq və bu, möhkəm, sarsılmaz və sübut olunmuş bir öhdəlikdir. O, ABŞ-ın 67 ildir Kubaya qarşı güc və təcavüz siyasəti yürütməsini tənqid edib və əlavə edib: “Birlikdə mübarizə aparacağıq və qalib gələcəyik. Bolivar və Çavista inqilabları, eləcə də Kuba inqilabı xalqlarımızın azadlığı üçün ortaq bir nümunə olacaq.”
Rodrigez 3 yanvar tarixində Venesuelanın Karakas şəhərində ABŞ-ın ölkəyə hücumları zamanı həyatını itirən əsgərlərin xatirəsinə həsr olunmuş anım mərasimində iştirak edib. Mərasimdə ABŞ prezidenti Donald Trampın Kubaya potensial hədəflərlə əlaqədar açıqlamaları xatırladılıb. Tramp son açıqlamalarında Kubaya “maksimum təzyiq” tətbiq olunduğunu və ölkəyə qarşı daha sərt tədbirlərin gündəmdə olduğunu bildirmişdi. O demişdi: “Düzünü desəm, düşünürəm ki, təzyiq göstərməyin ora gedib onu yerlə-yeksan etməkdən başqa yolu yoxdur. Onların bütün həyatı Venesuela olub. Onlar neftlərini, pullarını Venesueladan alıblar.”
Kuba hökuməti bildirib ki, ABŞ-ın Venesuelaya hərbi müdaxiləsi zamanı 32 əsgər və polis məmuru həyatını itirib.
Sədaqət Həsənova
