Son zamanlar bəzi mağazalarda satışa çıxarılan toyuq məhsullarının üzərində tüklərin qalması istehlakçılar arasında narazılıq yaradıb. Bəzən uzun, bəzən isə xırda tüklərin təmizlənmədən qalması alıcılar tərəfindən xoş qarşılanmır.
Bəs bu hal nə dərəcədə normaldır? Toyuq emalı zamanı tüklərin tam təmizlənməməsinin səbəbi nədir?
Redaktor.az-a açıqlamasında qida eksperti İlkin Şirinov bildirdi ki, tək-tük tüklərin qalması qida təhlükəsizliyi baxımından məhsulun keyfiyyətsiz olması anlamına gəlmir:
“Burada alıcı məmnuniyyəti, vizual görüntünün ürəkaçan olmaması məsələsidir, təbii ki, bu da müştərilərin haqlı narazılığı ilə qarşılanır. Gün ərzində milyardlarla toyuğun bu cür formada, yəni tüklərinin təmizlənməsi təbii ki, rezin barabanlar vasitəsilə həyata keçirilir. Toyuqların həmin o dərin tük təbəqəsi ki var, həmin tüklər çox zəif olur və bunlar yarıda qırılaraq dərinin içində qalırlar”.
Ekspert qeyd etdi ki, broyler təsərrüfatlarında yetişdirilən quşlar əslində “toyuq” deyil, cücələrdir:
“Bu quşlar adətən 23–40 günlük olur. Yaşları az olsa da, xüsusi yemlərlə sürətlə çəkiləri artırılır. Həmin o cücələrin yalnız bədəni şişirdilir, yəni bədəni həmin o qarışıq yemlərlə, kökəldici yemlərlə böyüdülür, yaş isə özlüyündə az olaraq qalır. Broyler işi ilə məşğul olanlar belə onlara toyuq demir, özləri öz aralarında “cücə” deyə müraciət edirlər. Məsələn, “bu gün neçə cücə kəsildi?”, “sabah neçə cücə kəsiləcək?” – bu cür müraciət forması işlədilir”.
Onun sözlərinə görə, tüklərin qalmasının digər səbəblərindən biri istehsal prosesində yetərli nəzarətin olmamasıdır.
“Digər məsələ normal şəkildə qaynar suyun olmamasıdır. Yəni kəsimdə cücələrin sayı çox olur və təmizləmə prosesində nəzarətsizlik mövcud olur. Say çox olduğuna görə ona lazımi nəzarət edilmir, sanki “bu gün kəsildi, bu gün də artıq bunun satışı təşkil olundu”. Təbii ki, bu da buzlanmamış vəziyyətdə olur. Buzlanmış, paketlənmiş, müxtəlif markalanmış toyuqlara baxsaq görərik ki, bu tük məsələsi yoxdur. Çünki bunlar bir baxışdan keçirilir, ondan sonra paketlənir. Amma bu cür kəsilmiş formada, yəni yeni kəsilmiş halda marketlərə, satış yerlərinə çatdırılan toyuqlarda bu tüklərin qalması mümkün ola bilər. Bu da istehsalata nəzarətsizlik məsələsidir, təmizləmə prosesində nəzarətsizliyin nəticəsidir. Bu isə haqlı narazılıq yarada bilər, ən azından vizual görüntünü poza bilər. Müştərilər üçün artıq bu, əlavə iş deməkdir. Alıcı məhsulu evə apardıqdan sonra yenidən təmizləmək məcburiyyətində qalır”, – deyə İlkin Şirinov qeyd etdi.
