İranın Ekspertlər Şurasından verilən açıqlamada bildirilib ki, ölkənin yeni Ali Rəhbərinin seçilməsi prosesi uzun çəkməyəcək. Bu açıqlamadan sonra belə bir qənaət yaranıb ki, yaxın vaxtlarda yeni dini lider müəyyənləşəcək. Lakin potensial namizədlərin kimliyi hələlik rəsmən bəlli deyil.
Bununla bağlı Sfera.az-a açıqlama verən politoloq Oqtay Qasımov bildirib ki, İranda yeni rəhbərin seçilməsi prosesi, adətən, uzun çəkmir:
“Biz xatırlayırıq ki, 1989-cu ildə Ruhullah Xomeyni dünyasını dəyişdikdən sonra Əli Xamenei məhz çox qısa müddətdə Ali Rəhbər vəzifəsinə seçilmişdi. Hazırda müharibənin getdiyi bir dönəmdə artıq müvəqqəti rəhbərlik şurası yaradılıb və yaxın günlərdə yeni dini rəhbərin seçilməsi ilə bağlı razılaşmaların olduğu bildirilir. Düşünürəm ki, bu proses ən qısa müddətdə həyata keçirilə bilər.
Onu da qeyd etmək lazımdır ki, hələ Xameneinin vəfatından bir neçə ay əvvəl onun üç nəfərin üzərində dayandığı və həmin şəxslərin potensial namizəd kimi Məsləhət Şurasına təqdim olunacağı ilə bağlı iddialar yayılmışdı. Post-Xamenei dövrü ilə bağlı ABŞ-nin Prezidenti Donald Tramp tərəfindən səsləndirilən məlumatlara görə isə həmin üç şəxsin aradan götürüldüyü iddia olunur. Amma bunun nə dərəcədə doğru olduğunu demək hələlik çətin məsələdir”.
Politoloq rəhbərliyə namizədlərdən birinin hazırda Rəhbərlik Şurasında təmsil olunan Ərafi ola biləcəyini qeyd edib:
“Digər bir neçə nəfərin də adı bu məsələdə hallanır. Hər halda, düşünürəm ki, son məqamda İranın Məsləhət Şurası tərəfindən siyasi elitanın razılaşdırdığı bir şəxs seçiləcək. Bu baxımdan, hazırda konkret bir ad çəkmək çətindir. Ola bilsin ki, uzun müddət gizli saxlanılan və adı çox hallanmayan bir şəxs də ortaya çıxsın. Əgər doğrudan da üç namizəd olubsa və bu gün müvəqqəti Rəhbərlik Şurasında Ərafi də təmsil olunursa, onun həm dini camiədə, həm də dövlət strukturlarındakı təcrübəsi nəzərə alınaraq potensial namizəd kimi qiymətləndirilməsi mümkündür. Lakin sürpriz bir şəxsin seçilməsi ehtimalı da istisna deyil. Yəni, siyasi və hərbi elitanın razılaşdırdığı tamamilə başqa bir namizəd də seçilə bilər”.
