Sosial şəbəkələrdə və bir sıra media resurslarında millət vəkili Səyyad Aranın nəvəsinə məxsus olduğu iddia edilən lüks avtomobillərin fotoları yayılıb.
Gündəm24.az xəbər verir ki, manset.az məsələni dəqiqləşdirmək üçün millət vəkili Səyyad Aranla əlaqə saxlayıb.
O, yazılanların yalan olduğunu bildirib:
“Bunu şərəfsizlər uydurur. Mən çıxışımda bir söz demişəm deyə, düşüblər mənim üstümə. Yalan sözdür, nə kolleksiya? Nəvəmin elə lüks kolleksiyası olsaydı, mənim şəxsi avtomobilim olardı. Bu nə gülünc sözdür, bu nə iftiradır? Nəvəmin bir maşını var, heç onun da 20 min manat qiyməti yoxdur. O, “üçüncü əldən” alınmış maşındır. Mənim nəvəmdir deyə maşını olmalı deyil? Şişirdib yazırlar ki, onun neçə yüz manatlıq avtomobilləri var” Səyyad Aran əlavə edib ki, onun son müsahibəsində dedikləri təhrif olunub: “Mən nə demişəm?? Orta məktəbdə müəllimlərimizin dediyi sözü təkrarlamışam ki, yaxşı oxuyun, nailiyyətlər əldə edin və yüksək vəzifələrdə işləyin, yüksək də maaş alın. Bu nə sözdür ki, buna görə çoxu mənim haqqımda yalan məlumatlar yayır? Neçə-neçə insan kimlərəsə deyə bilmədiyi sözü mənə ismarıc kimi göndərir. Bunlar hamısı düşməncəsinə və kampaniya xarakteri daşıyan proseslərdir. Mən şadam ki, minlərlə insana hirsini, hikkəsini soyutmaq üçün bir vasitə oldum. Səyyadın canına and olsun, bu yazılanlar böhtandır. Hələ mən bilmirəm ki, o maşın mənim nəvəmindir, yoxsa dostunun. Heç maraqlanmıram da”.
