Azərbaycanın media məkanında “Space” telekanalının fəaliyyətini dayandıracağı ilə bağlı sarsıdıcı iddialar yayılıb. Kanalın gələcək taleyi ilə bağlı yaranan qeyri-müəyyənlik sosial şəbəkələrdə geniş müzakirələrə yol açıb.
Bakupost.az xəbər verir ki, jurnalist Arifə Əliyeva şəxsi “Facebook” hesabında paylaşım edərək telekanalın bağlanma ərəfəsində olduğunu bildirib. Jurnalist əldə etdiyi son bilgilərə istinadən qeyd edib ki, kanal artıq fəaliyyətini tamamilə dayandırmağa hazırlaşır.
A.Əliyeva paylaşımında kanalın düşdüyü bu acınacaqlı vəziyyətin səbəbini idarəetmə səhvlərində görüb: “Bəli, düzgün idarəçilik olmayanda nəticə belə olur. Amma ən ağır zərbəni qərar verənlər yox, zəhmət çəkən sadə əməkdaşlar alır”.
Hələlik sözügedən iddialarla bağlı nə telekanalın rəhbərliyi, nə də rəsmi qurumlar tərəfindən hər hansı təsdiq və ya təkzib xarakterli açıqlama verilməyib. Bununla belə, jurnalistin bu çıxışı artıq media camiəsində böyük rezonans doğurub. Mövzu ilə bağlı əlavə təfərrüatlar bəlli olduqca oxuculara məlumat təqdim olunacaq.
