Sərnişinlərin ictimai nəqliyyatdan şikayəti günü-gündən artmaqda davam edir.
Bu şikayətlərdən biri də ictimai nəqliyyatdan istifadə edilmədiyi halda, vətəndaşların bank kartlarından vəsaitlərin silinməsilə bağlıdır.
Bakupost.az xəbər verir ki, bu barədə çoxsaylı şikayətlər yaranıb. Məsələ hətta sosial şəbəkələrdə geniş müzakirə olunub. İnsanlar bu halları soyğunçuluq kimi dəyərləndirirlər.
Qeyd edək ki, hər gün 650-700 min insan metrodan, 630 minə qədər insan isə avtobuslardan istifadə edir.
İKT İnformasiya Mərkəzinin direktoru Fərid Kazımov Bakupost.az-a bildirib ki, bu transaksiya problemidir:
“Bəzən ödəniş kartdan çıxanda məlumat gec çatır. Kart ödənişi qəbul edir. Sistem onu götürür. Amma məlumat sonradan gəlir. Nəticədə sərnişində elə bir fikir yaranır ki, bir gedişə görə iki dəfə pul çıxılır. Məsələ ondadır ki, ödənişi Google, Apple ediriksə, məlumat həmin an gəlir. Amma kartla ödənişdə sms məlumatlanma məsələsində gecikmə yarana bilər”.
Ona görə də həmsöhbətimiz problemin olmaması üçün Google, Apple-dən istifadə edilməsini məsləhət gördü:
“Bu sistemlər Masterkart Visa üzərindən istifadə olunduğuna görə, iki dəfə ödəniş məsələsi ümumiyyətlə mümkün deyil. Çünki bunu Azərbaycan bankları, AYNA və s. etmir. Bunlar beynəlxalq təcrübəyə malik MasterKart və Visa tərəfindən istifadə olunan modeldir. Yəni ölkəmizdə baş verən bu olaylar sadəcə olaraq sms məlumatlandırma məsələsidir. Məlumat bir qədər gecikəndə insanlarda beləcə müəyyən şübhələr yaranır. Amma dediyim ki, MasterKart, Visa sistemləri çox dəqiq işləyən sistemlərdir”.
