Xəbər verdiyimiz kimi, bu gün Azərbaycanda qısaldılmış iş günüdür. Belə ki, 9 May – Faşizm üzərində Qələbə Günüdür.
Qanunvericiliyə görə, iş günü hesab edilməyən bayramqabağı günlərdə iş gününün müddəti həftəlik iş günlərinin sayından asılı olmayaraq bir saat qısaldılır. Məcəlləyə görə, işçiyə iş günü hesab edilməyən bayram günləri görülən işə görə əməkhaqqı ödənilir.
Bundan başqa, istirahət, səsvermə, iş günü hesab edilməyən bayram günləri və ümumxalq hüzn günü işləmiş işçinin arzusu ilə ona əməkhaqqı əvəzinə başqa istirahət günü verilə bilər. Eyni zamanda, əməkhaqqının verilməsi günü istirahət, səsvermə, ümumxalq hüzn günü və ya iş günü hesab edilməyən bayram günlərinə təsadüf etdikdə, o bilavasitə həmin günlərdən əvvəlki gündə verilir.
Bəs müəssisə rəhbəri işçilərinin 1 saat tez çıxmasına icazə verməyə bilərmi? Bu qanunla tənzimlənirsə, o halda müəssisə rəhbərlərini hansı cəza gözləyir?
Mövzu ilə bağlı Sfera.az-a açıqlama verən vəkil Turan Abdullazadə bildirib ki, Əmək Məcəlləsinin 108-ci maddəsinin 1-ci hissəsinə görə, Bu Məcəllənin 91, 92 və 93-cü maddələrində nəzərdə tutulmuş hallar istisna olunmaqla, iş günü hesab edilməyən bayram günündən bilavasitə əvvəl gələn iş gününün müddəti həftəlik iş günlərinin sayından asılı olmayaraq bir saat qısaldılır.
T.Abdullazadə qeyd edib ki, bu, işəgötürənin istəyinə bağlı deyil, qanunla müəyyən edilmiş məcburi-imperativ tələbdir. Yəni müəssisə rəhbəri işçilərin 1 saat tez çıxmasına icazə verməmək hüququna malik deyil:
“Əgər müəssisə rəhbəri bu tələbi yerinə yetirməsə, yəni işçiləri bayramqabağı gündə tam saatda saxlasa, bu, əmək qanunvericiliyinin pozulması sayılır. İnzibati Xətalar Məcəlləsinin 198.1.5-ci maddəsinə görə, normal əmək və istirahət rejiminə riayət edilməməsinə, o cümlədən əmək qanunvericiliyinin tələbləri pozulmaqla işçinin iş vaxtından artıq işlərə cəlb edilməsinə görə 500 manatdan 1000 manatadək cərimə nəzərdə tutulub. Beləliklə, bayramqabağı iş vaxtının 1 saat qısaldılması məcburidir, rəhbər bunu rədd edə bilməz və əks halda 500-1000 AZN məbləğində inzibati cərimə ilə üzləşə bilər. Hüququ pozulmuş işçi isə Əmək və Əhalinin Sosial Müdafiəsi Nazirliyinə və ya məhkəməyə müraciət etmək hüququna malikdir”.
