Son illərdə Azərbaycanda özəl məktəb və kurslara maraq əhəmiyyətli dərəcədə artıb. Valideynlər övladlarının daha keyfiyyətli təhsil alması, xarici dil biliklərinin inkişafı və beynəlxalq proqramlara çıxış əldə etməsi üçün bu müəssisələrə daha çox üstünlük verirlər. Artan tələbat fonunda təhsil xidmətlərinin qiymətlərində də ciddi yüksəliş müşahidə olunur.
Gündəm24.az xəbər verir ki, Azərbaycanda özəl təhsil müəssisələrinə marağın artması fonunda məktəb və kurs qiymətləri yüksəlməkdə davam edir.
Hazırda ölkədə fəaliyyət göstərən özəl məktəblərdə illik təhsil haqları təxminən 2 500 manatdan başlayaraq 50 000 manatdan yuxarı məbləğlərə qədər çatır. Xüsusilə beynəlxalq proqramlar təqdim edən və xarici dil tədrisinə üstünlük verən məktəblərdə qiymətlər daha yüksəkdir.
Qiymət aralığı məktəbin tədris proqramı, beynəlxalq akkreditasiyası, təklif etdiyi əlavə xidmətlər və sinif səviyyəsinə görə dəyişir. Məsələn, bəzi liseylərdə illik ödənişlər 3-5 min manat aralığında olduğu halda, beynəlxalq məktəblərdə bu rəqəm 20-25 min manatı, bəzi hallarda isə 50 min manatı keçir.
Bakı Atatürk Liseyi, Simurq Liseyi və “Western School” daha münasib qiymət seqmentində yer alan təhsil müəssisələri sırasında göstərilir. Daha yüksək ödəniş tələb edən məktəblər arasında isə “Bakı Oxford Məktəbi”, “Oxbridge Academy Baku”, Azərbaycan Britaniya Kolleci və Azərbaycan Beynəlxalq Məktəbi (TISA) diqqət çəkir. Siyahıda ən yüksək illik təhsil haqqı məhz TISA-ya məxsusdur və 54 900 manat təşkil edir.
Məktəblərlə yanaşı, hazırlıq kursları da ailələrin büdcəsində ciddi xərc maddəsinə çevrilib. Buraxılış və qəbul imtahanlarına hazırlıq, xarici dil kursları, məktəbəqədər hazırlıq proqramları və erkən inkişaf mərkəzlərinə maraq artdıqca qiymətlərdə də yüksəliş müşahidə olunur.
Hazırda bazarda bir fənn üzrə aylıq hazırlıq qiymətləri orta hesabla 70-150 manat arasında dəyişir. Beynəlxalq sertifikat və xarici dil proqramlarında isə ödənişlər daha yüksək olur. Bir neçə fənn üzrə hazırlıq keçən şagirdlər üçün aylıq kurs xərcləri 300-500 manata qədər yüksələ bilir. Bu isə xüsusilə bir neçə övladı olan ailələr üçün təhsil xərclərinin ildən-ilə daha böyük maliyyə yükünə çevrildiyini göstərir./Sfera.az
