İranın yeni Ali Rəhbəri Ayətullah Seyid Müctəba Xameneinin mart ayında baş verən hərbi gərginlik və bombardmanlar zamanı aldığı xəsarətlərlə bağlı rəsmi məlumat yayılıb.
Gündəm24.az NOCOMMENT.az-a istinadən xəbər verir ki, İran Səhiyyə Nazirliyinin İctimaiyyətlə Əlaqələr və İnformasiya Mərkəzinin rəhbəri Hüseyn Kərmanpur Ali Liderin səhhəti barədə danışıb. Nazirlik rəsmisi Müctəba Xameneinin üz, baş və ayaq nahiyələrindən yüngül xəsarətlər aldığını təsdiqləyib.
Kərmanpurun sözlərinə görə, hadisənin miqyası fonunda ilkin olaraq fərqli təəssürat yaransa da, Ali Lider faciədən ciddi zədələr almadan qurtulub:
“İlkin təsəvvür belə olub ki, bu cür ağır bombardmandan çıxan birinin bədənində çox ciddi xəsarətlər olmalıdır. Lakin aparılan müayinələr nəticəsində üz, baş və ayaqlardakı səthi zədələr istisna olmaqla, başqa heç bir təhlükəli hal qeydə alınmayıb. Yaralanan nahiyələrə yalnız bir-iki tikişin qoyulmasına ehtiyac yaranıb”.
Səhiyyə Nazirliyinin rəsmisi həmçinin əlavə edib ki, Ayətullah Müctəba Xamenei hələ mart ayının əvvəlində müalicə olunduğu xəstəxanadan evə buraxılıb. Həkimlərin bütün israrlarına baxmayaraq, Ali Rəhbər Ramazan ayında orucunu açmayıb ki, bu da onun ümumi sağlamlıq və fiziki vəziyyətinin tam qaydasında olduğuna işarə kimi qiymətləndirilib. Hazırda dövlət başçısının səhhətində hər hansı narahatlığa əsas yoxdur.
