Rodion Miroşnik bildirib ki, itkilərin əksəriyyəti Luqansk və Donetsk Xalq respublikalarında, eləcə də Belqorod və Zaporojye vilayətlərində qeydə alınıb.
Gündəm24.az xəbər verir ki, Rusiya Xarici İşlər Nazirliyinin xüsusi tapşırıqlar üzrə səfiri Rodion Miroşnik TASS-a açıqlamasında bildirib ki, Ukraynanın son bir həftədə Rusiya bölgələrinə həyata keçirdiyi hücumlar nəticəsində 50-dən çox mülki şəxs həyatını itirib, təxminən 200 nəfər yaralanıb. Ölənlər arasında bir uşaq da var.
Miroşnikin sözlərinə görə, hücumlar ümumilikdə 250 mülki şəxsə təsir edib. Yaralananlar arasında 20 azyaşlı olduğu qeyd olunub. Ən ağır itkilərin Luqansk Xalq Respublikası, Donetsk Xalq Respublikası, Belqorod vilayəti və Zaporojye vilayəti ərazilərində qeydə alındığı bildirilib.
Diplomat dron hücumlarının xüsusi təhlükə yaratdığını vurğulayaraq qeyd edib ki, ümumi itkilərin 91 faizi pilotsuz uçuş aparatlarının zərbələri ilə bağlıdır. O, həmçinin Ukrayna qüvvələrinin beynəlxalq humanitar hüququ pozaraq tibbi nəqliyyat vasitələrini də hədəfə aldığını iddia edib.
Açıqlamada bildirilib ki, Belqorod vilayətində FPV dronunun təcili yardım maşınına hücumu nəticəsində sürücü yaralanıb. Bundan başqa, uzaqdan minalama halları səbəbindən bölgələrdə mülki itkilərin artdığı qeyd olunub. Miroşnik son yeddi gündə Rusiya ərazisinə 4300 mərmi atıldığını da açıqlayıb.
Sədaqət Həsənova
