“İnsanlar artıq yetkinlik yaşını keçmiş, müəyyən bir yaşdadırlar — 20-30 və ya 35-40 yaş arası. Bu insanlar həmin yaşa qədər hər zaman səhər yeməyi qəbul ediblər. Səhər yeməyini qəbul etdikdən sonra işlərinin arxasınca gediblər. Yəni, illərlə formalaşmış bir vərdişdən söhbət gedir. Əgər insanlar bu yaşdan sonra səhər yeməyini tərgidərlərsə, bədən artıq öyrəşdiyi bu qidanı qəbul etmədiyi üçün müəyyən dəyişikliklər baş verəcək”. Bu sözləri SİA-ya açıqlamasında qida eksperti İlkin Şirinov bildirib.
Onun sözlərinə görə, təbii ki, bu həm psixoloji, həm də fizioloji baxımdan özünü göstərəcək: “İnsanda yorğunluq hissi yaranacaq, insulin səviyyəsində və bədəndəki şəkər balansında dəyişiklik müşahidə ediləcək. Qlükozanın səviyyəsi də bu prosesdən təsirlənəcək. Bu məsələni daha ətraflı, təbii ki, həkimlər izah edə bilərlər.
Səhər yeməyi həm gün ərzində insanların enerjisini qorumağa, həm də iş saatlarında balanslı fəaliyyət göstərməyə kömək edir. Əgər səhər yeməyi qəbul edilməzsə, qan şəkərinin düşməsi müşahidə oluna bilər. Bu hal uşaqlarda daha qabarıq şəkildə özünü göstərir. Bildiyimiz kimi, uşaqlar səhər yeməyindən sonra məktəbə gedirlər, aktiv fəaliyyət göstərirlər. Əgər səhər yeməyi qəbul edilməzsə, bədəndə olan xolesterin balansı da poza bilər. Yaxşı və zərərli xolesterin səviyyələri arasında tarazlıq pozulduqda, bu da orqanizm üçün mənfi nəticələrə gətirib çıxarır.
Bəzən müşahidə olunur ki, insanlar yuxudan durur, lakin səhər yeməyi yemədən birbaşa siqaret çəkirlər. Təbii ki, bu zaman bədənin balansı pozulur, əsəbilik artır, psixoloji gərginlik yaranır. Bu, həm də insanın ümumi əhval-ruhiyyəsinə mənfi təsir göstərir. Deməli, səhər yeməyi təkcə yemək faktoru kimi deyil, həm də psixoloji tarazlıq üçün vacib amildir. Səhər yeməyi insanın gün ərzində gərginlik keçirməməsi, daha rahat və enerjili olması baxımından böyük əhəmiyyət daşıyır.
Məsələyə təkcə qidalanma aspektindən baxmaq düzgün olmaz. Səhər yeməyi həm bədənin, həm də beynin fəaliyyətinə birbaşa təsir edir. Bəzi tədqiqatlarda qeyd olunur ki, səhər yeməyi yeyən insanlarda ürək xəstəlikləri və qəfil ölüm riski daha az olur. Bu, tam elmi şəkildə sübut edilməsə də, müşahidə olunan bir tendensiyadır. Eyni zamanda, səhər yeməyi yeməyən insanların gün ərzində daha çox kalori qəbul etmək ehtiyacı yaranır. Yəni, gün ərzində artıq yemək halları baş verir. Əgər yorğunluq, əsəbilik və diqqət dağınıqlığı kimi hallardan qaçmaq istəyiriksə, mütləq normal şəkildə səhər yeməyi qəbul edib sonra günə başlamalıyıq. Bu, həm sağlamlıq, həm də gün ərzində səmərəli fəaliyyət baxımından vacibdir”.
