Mən ailədə özümə görə bir çox şeyə göz yumaram. Amma ortada uşaqlar var idi. Əgər bunu mənimlə üz-üzə danışsaydı, başqa birinə aşiq olduğunu desəydi, bəlkə də onu daha anlayışla qarşılayardım.
Gündəm24.az Qaynarinfo-ya istinadla xəbər verir ki, bunu Əməkdar artist Rəhman Rəhmanovun keçmiş həyat yoldaşı Ulduz Əhmədova aktyorla olan ailə münasibətlərindən danışarkən deyib.
O, aparıcı Ülvira Qarayevanınnın suallarını cavablandırarkən Rəhman Rəhmanovu heç vaxt qısqanmadığını bildirib:
“Çünki kiminlə ailə qurduğumu bilirdim, söz-söhbətə əhəmiyyət vermirdim. Günlərin birində Rəhman evdən birdəfəlik getdi. O vaxt 35 yaşım vardı, gənc gəlin idim. Daha sonra məni maşın vurdu, yatağa düşdüm. Evə çörək gətirən belə yox idi. Halbuki o, heç vaxt mənə bazara getməyə belə imkan vermirdi, hər işi özü görürdü”.
Onun sözlərinə görə, həmin çətin günlərdə aktyor ailəni tərk edib:
“Evdə 4 uşaq vardı, onların qayğısına qalan yox idi. Rəhman evə gəlmirdi. Sonradan evə qayıtdığı gün onu qovdum. Ondan əvvəl isə mənə çatdırılan söz-söhbətlər oldu ki, onun başqa bir qadınla münasibəti var. Sonradan bildim ki, bu onun ikinci həyat yoldaşıdır. Həmin gün evdən çıxdı və bir daha geri qayıtmadı”.
Qeyd edək ki, Rəhman Rəhmanov iki dəfə ailə qurub. Onun birinci evliliyindən 4 övladı, ikinci evliliyindən isə övladı olmayıb.
