Son aylarda ABŞ dollarının qlobal bazarlarda möhkəmlənməsi bir sıra ölkələrin milli valyutalarına təzyiqi artırıb. Bu proses fonunda Azərbaycanda da manatın gələcək taleyi və mümkün devalvasiya ehtimalı ilə bağlı müzakirələr intensivləşib.
Bəs dolların qlobal güclənməsi fonunda Azərbaycanda devalvasiya riski nə dərəcədə realdır?
Mövzu ilə bağlı KONKRET.az-a açıqlama verən Liberal İqtisadçılar Mərkəzinin sədri Akif Nəsirli bildirib ki, mövcud iqtisadi göstəricilər yaxın perspektivdə kəskin devalvasiya ehtimalının yüksək olmadığını göstərir.
Onun sözlərinə görə, dolların dünya miqyasında bahalaşması Azərbaycan iqtisadiyyatına müəyyən təzyiqlər yaratsa da, hazırkı şəraitdə manatın məzənnəsinin ciddi risk altında olduğunu söyləmək üçün kifayət qədər əsas yoxdur.
“Yüksək həcmdə strateji valyuta ehtiyatları, neft və təbii qaz ixracından əldə edilən sabit gəlirlər, eləcə də Mərkəzi Bankın məzənnə sabitliyini qorumaq imkanları manatı dəstəkləyən əsas amillərdir. Bu baxımdan yaxın dövr üçün kəskin devalvasiya ssenarisi real görünmür”, – deyə ekspert vurğulayıb.
Akif Nəsirli qeyd edib ki, risklər tamamilə aradan qalxmış hesab edilə bilməz. Onun fikrincə, dünya enerji bazarında qiymətlərin uzun müddət aşağı səviyyədə qalması, ölkəyə xarici valyuta axınının zəifləməsi və qlobal maliyyə bazarlarında ciddi qeyri-sabitliyin yaranması halında manat üzərində təzyiqlər arta bilər.
Ekspert hesab edir ki, hazırkı makroiqtisadi vəziyyət və mövcud maliyyə ehtiyatları nəzərə alındıqda, yaxın perspektivdə kəskin devalvasiya ehtimalı aşağı qiymətləndirilir. Onun sözlərinə görə, hazırda manatın sabitliyini təmin edən əsas faktorlar qüvvədə qalır və bazarda təşviş yaradacaq iqtisadi əsaslar müşahidə olunmur.
