Şuşada “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda IV Şuşa Qlobal Media Forumunun açılış mərasimi keçirilib. Tədbirdə dünyanın nüfuzlu media qurumlarının rəhbərləri, təşkilat nümayəndələri iştirak edib. Prezident İlham Əliyev forumdakı çıxışı zamamı bir sıra mühüm mesajlar verib.
Gündəm24.az xəbər verir ki, jurnalist İlkin Şirinov tədbirin əhəmiyyəti ilə bağlı danışarkən bildirib ki, Şuşa Qlobal Media Forumu Azərbaycanın beynəlxalq nüfuzunu və artan geosiyasi rolunu bir daha nümayiş etdirdi.
Onun sözlərinə görə, 54 ölkədən media nümayəndələrinin məhz işğaldan azad olunan Şuşada bir araya gəlməsi Azərbaycanın tarixi Zəfərinin və diplomatik uğurlarının beynəlxalq miqyasda təsdiqidir.
“Şuşadan verilən mesajlar göstərdi ki, Azərbaycan Cənubi Qafqazın lider dövləti olmaqla yanaşı, qlobal proseslərdə söz sahibi olan, etibarlı və məsuliyyətli tərəfdaş kimi qəbul edilir”, – deyə jurnalist vurğulayıb.
İlkin Şirinov hesab edir ki, Şuşada keçirilən belə mötəbər beynəlxalq forumlar Azərbaycanın diplomatik mövqeyinin daha da möhkəmlənməsinin və ölkənin beynəlxalq nüfuzunun artmasının bariz göstəricisidir.
